Shillong, Nailar 18: Ka Assembly’s Estimates Committee ha ka sngi Nyngkong, ka la bthah ban pyndep noh ia ka jingtei jong ka ophis ka Umsning Community & Rural Development Block hapoh u bnai Naiwieng 2025.
Ia kane ka jingbthah la pynmih ha ka jingleit jurip ba la pynlong da ka Committee hapoh ka jingialam u MLA ka UDP na Nongpoh constituency Bah Mayralborn Syiem kum u Chairman ka Committee.
“Ngi la pynlong ïa kane ka jingjurip lyngba ka Estimates Committee jong ka Meghalaya Legislative Assembly. Ka jingthmu ba kongsan jong ka jingjurip ka long ban buddien ïa ka jingtei kaba dang ïaid shakhmat jong ka Block Development Officer’s office kaba don ha Umsning C&RD Block. Kane ka project kadei kaba la sahteng bun snem bha bad naka liang ka Committee kala lap iaki daw ba slem ka Project”.
“Ngi la pynlong ïa ka jingpeit bniah ïa ka jaka bad ngi la ïoh ïa ka jingpynshai kaba bniah na ki heh ophisar ka Community and Rural Development. Ka Committee ka la bthah ïa u kontraktor ba dei peit ban pyndep ïa ka kam ha u bnai Naiwieng 2025” la ong u Bah Mayralborn.
U Bah Mayralborn u la bynrap “Ngi kyrmen ba ka jingbuddien iaka kam jong ka CRD kan lah ban pyndep kloi bad shen kane ka projek kan sa treikam noh ban ai ka jingshakri kaba kham bha sha ki paidbah, kynthup ïa ki khlieh nongsynshar, ki Seng Shnong (VO), ki Self-Help Group.”
Ka Committee ka la jurip ruh ia ki projek ITI bad Polytechnic, da kaba kdew ba ki kam ki iaid beit hynrei ki don katto katne ba hap ban pynsted.
“Ka projek Polytechnic ka iaid bha bad la khmih lynti ba yn pyndep ha ki bnai ban wan, ka ban ai jingmyntoi ia ki samla pule lyngba ki jingpule bapher bapher. Hynrei ka projek ITI ka la mad ia ka jingdkoh namar ki jingeh kum ka jingshna ia ka surok, ka jingpynpoi bording shabar, bad ka jingpynpoi um” ula ong.
“Ka Committee ka la shim khia ia kine ki jingeh bad kan buddien ia ki bad ki tnat ba dei peit ban pynthikna ba ka projek kan long kaba treikam kloi tam,” u la bynrap.
Ha kane ka sngi la don lang daki dkhot jong ka committee ba kynthup u Bah Wailadmiki Shylla (Jowai), Remington Gabil Momin (Rambrai Jyrngam), Charles Marngar (Mawhati), and Adelbert Nongrum (North Shillong) bad Dr. Celestine Lyngdoh (MLA Umsning).
