Shillong, Iaiong 03: U National General Secretary ka BJP Rituraj Sinha hynne ka sngi ula ong ba ka Party ka dang iai bteng ban ieng haka nongrim ban pyrshah iaka bamsap watla ka don lang haka sorkar synroplang Meghalaya Democratic Alliance 2.0 ba ialam daka National People’s Party (NPP).
“Ka bamsap kadei ka jingpang haka synshar paidbah bad kadei ka mawjynthut iaka roi ka par bad ka BJP kadei ka Party kaba pyrshah jur iaka bamsap, ka jingsynshar tang kawei ka iing” la ong u Sinha.
Lah ban kdew ba u Myntri ka tnat kam pohïing ka sorkar pdeng u Amit Shah ula kynnoh ba ka Meghalaya kadei kawei na ki jylla kaba bamsap tam ha baroh kawei ka ri.
U Sinha ula ong ba ka ilekshon kala kut bad mynta ka lah dei ka por ban iatreilang ban pynthikna ba ka sorkar kan neh naka bynta ka jingmyntoi ka jylla Meghalaya.
“Ka jylla Meghalaya ka dang donkam shibun ki kam pynroi bad kadei ruh ka jylla ba shem jingeh haka jingdon pisa naka bynta ban pyntreikam iaki kam pynroi bad dei namar kane, donkam ka jingiatreilang hapdeng ka sorkar jylla bad ka sorkar pdeng naka bynta ka jingmyntoi ki paidbah bad ka jylla baroh kawei” ula ong.
Haba iadei bad ka jingbym lah ka BJP ban jop bun ha ka ilekshon MLA ba dang shu dep, u Sinha ula ong ha man ki ilekshon kadei ka kamram jong baroh ban trei naka bynta ban pynjop bun iala ka Party bad haka synshar paidbah hadien ka jingthep Vote, dei ban burom iaka rai u paidbah bad ka BJP ruh ka iai burom iaka jubab bala ioh na u paidbah.
Haba kyntait iaka jingkynnoh ba ki paidbah ki kyntait iaka BJP, u Sinha ula ong “Ngam ngeit ia kata bad nga ngeit ba ki paidbah ki kyrshan iaka BJP namar ka jingioh Votes ha u snem 2018 kala kiew arshah haka jingioh Vote mynta u snem bad ngi la iohi iaka jingwan rung kiwei ki dkhot shaka BJP namar ka Party ka la lah ban pynieng haduh 60 ngut ki kyrtong bad naka liang ka Party kan nang trei shitom ban pynkhlain iaka Party ha ki sngi ban wan”.
U Sinha ula ong ruh ba iaka jingdawa ban weng noh president ka Meghalaya BJP yn shim hi da u national president ka Party u JP Nadda bad ia kane yn sa shim haka por ka ba biang.
“Haba iadei bad kane yn sa shim haka por ba biang hynrei haduh mynta kam pat don ka jingiakren halor kane” ula ong.
