Shah pynpra 278 tylli ki ïing bad ioh biang ia ka jaka kaba 250 Hektar
Guwahati, Naitung 31: Ki bor ba dei khmih kila pynpra noh haduh 278 tylli ki iing kiba la shna khlem da ioh jingbit bad kila ioh ban kam trai biang ia ki jaka kaba la kot haduh 250 hektar kiba dei jong ka tnad Forest, ha Golaghat District jong ka jylla Assam ha ka sngi kaba ar jong ka jingkyndang ia kiba wan buhai shnong be-aiñ ha Uriamghat Rengma Reserve Forest.
Ha ka jingiatrei lang hapdeng ka tnad Forest bad ki bor pyniaid district jong ka Golaghat bad ki pulit kila thew beit ia kito kiba wan kyntur pud bad ba wan buhai shnong be-aiñ ha Pithaghat bad ha Sonaribeel.
Na ka liang ki ophisar kila pyntikna ba 180 tylli ki iing la dep ban pynpra na Pithaghat bad 98 tylli na Sonaribeel, ha kaba ym shym la don kiba shong basah hapoh iing ha ka por ba pynpra ia ki, hashwa jong kane la dep ban ai notis bad ka jingkyndang kala iaid beit iaid ryntih ha ryngkat ka jingbud ryntih ia ki kyndon.
Nalor ka jingpynpra ia ki iing ki sem, ia ki dieng kwai bad ki dieng snepkor, ki mar rep kum ki jhur bad kumjuh ruh ia ki iing trep la dep ban jynrat lut kiba la thung daki nongwan buhai shnong be-aiñ bad na ka liang u Special Chief Secretary u M.K. Yadava u pynpaw ba ia kane ka jaka kaba la ioh ban kam biang un pynkylla ban pynbha ia ka mariang bad ban pynkhie im biang ia ki khlaw ki btap.
U Deputy Commissioner ka Golaghat u Pulak Mahanta u la pynpaw ba ki bor pyniaid district kim lah ban pdiang ia kine kiba shu wan klun be-aiñ ia ki jaka jong ka tnad Forest. Ula bynrap ba tang 75 tylli ki longïing na Negheribeel kiba la ïoh jingïarap shipor na ka Gauhati High Court haduh ka 7 tarik u Nailar ki la pyllait, na ka bynta mynta jong ka jingkyndang ban pynkynriah.
U Inspector General of Police u Akhilesh Kr Singh ula ïaroh ïa ka jingïatreilang hapdeng ka Assam bad ka Nagaland, da kaba ong, ba ka long kaba kongsan bha na ka bynta ka jingjop jong kane ka jingpynkynriah. Ia kane ka jingpynkynriah la peit bniah da ki heh ophisar, ba kynthup ia u PCCF u Sandeep Kumar, ki heh jong ka tnad Forest bad ki pulit, bad ki heh ophisar sorkar.
Kane ka jingkyndang ban pynkynriah kala sdang ha ka 29 tarik mynta u bnai Naitung da kaba pynpra ia ki 120 tylli ki dukan bad ki jaka ia khaii pateng ha Iew Bidyapur, kaba la pyllait haduh 4.2 hektar ka jaka ha ka sngi kaba nyngkong. Ha ka jingkhein kyllum, kane ka jingpynkhreh ka thmu ban pynkynriah ia ki iing kiba shong be-aiñ ha ki jaka ba la kot haduh 11,000 bigha ki jaka bad ki iing ki ban shah ktah ha kylleng ki 12 tylli ki shnong, la antad ki ban shah ktah ki long iing kin don kumba 2,648 tylli bad kiba bun kim don satia ia ki kot pata na ka sorkar.
Ha kane ka jingkyndang la pyndonkam haduh 1,500 ngut ki pulit bad ki CRPF, 500 ngut ki nongtrei ka tnad Forest, 500 ngut ki nongtrei bylla, bad palat 100 tylli ki puh shilum bad kane ka dei kawei na ki jingpyrshang kaba heh tam ha kine ki snem ba la dep. La buh por ban bteng haduh ka 2 tarik u Nailar, ki heh sorkar ki la pyni ba lah ban pynjlan ïa ka jingpynlong katkum ki jingdonkam.
