Shillong, Naiwieng 24 : U President ka NPP Meghalaya u Bah Prestone Tynsong hynne ka sngi Thohdieng ula pynbna ba ka Dr Ampareen Lyngdoh kan iakhun ia ka MP Election Lok Sabha na Shillong Parliamentary Constituency.
Ka NPP ha kane ka kynti kala sei da ki kyrtong Kynthei ban iakhun ia ka elekshon Lok Sabha ha Jylla. Ka Dr Ampareen kan iakhun na Shillong bad ka MP ka NPP ba mynta ka Agatha Sangma kan iakhun biang na Tura Parliamentary Constituency.
Ula ong ba kane ka jingpynbna ka dei hadien ba la ioh ia ka jingmynjur na u National President ka NPP Conrad K Sangma uba dei ruh u Myntri Rangbah ka Jylla.
U Bah Prestone ula pynpaw ia ka jingskhem jingmut ba kine ki kyrtong kin jop namar ba ka seng NPP kadei kaba ioh khur bun vote tam ha ka elekshon MLA kaba la dep.
Haba iakren bad ki nongthoh khubor, u Bah Prestone ula iathuh ba ki don haduh 5-6 ngut kiba kwah ia ka ticket ka NPP na baroh artylli ki constituency. “Hynrei, ka State Election Committee hadien ka jingbishar bniah bad jingiasyllok ym tang ha ki District hynrei ha ki Booth Level, kala rai ban phah ia kine ki artylli ki kyrteng (Ampareen bad Agatha) sha ka High Command”.
U Bah Prestone ula kyntait pat ban iathuh ia ka kyrteng jong kiwei pat ki nongpan ticket da kaba ong “Kane ka dei ka kam bala buh shadien”.
Haba pynpaw ia ka jingsngewskhem ba ka NPP kann knieh noh ia ka Shillong Seat na ka Congress bad pynneh ia ka Tura Seat, u Bah Prestone ula ong ba ka party kala ioh bun eh ka bhah thep vote na baroh artylli ki constituency ha ka elekshon ML ba dang shu dep.
“Namar kata, nga thikna bha ba shisien ba ngi trei shitom, ngin lah ban ioh ia ka jingjop ha kane ka elekshon ban wan” ula ong.
U Bah Prestone ula ong ba ka NPP kala ioh bun duh ia ka bhah thep vote na Shillong Parliamentary constituency watla kala jop tang khyndiat ngut kiMLA ha ka elekshon 2023 bad bynrap ba hadien ka NPP, la bud ka UDP kaba wan baar bad ka Congress kaba wan balai ha ka jingioh vote.
“Ka Tura kam dei tang kaba bun em hynrei ngi la tam ia ka 50% , ka long kumba 52%” ula kam haba bynrap “Namar kata, ka party kan trei shirthem khamtam nga la bthah ia ki nongkitkam ba thymmai ba kin hiar sha man ki District bad ki Polling Booth…ngin rung ruh sha manla ki shnong” ula ong.
Halor ka jingkylli, u Bah Prestone ula ong ba ka NPP ka kwah ruh ban kyrpad ia baroh ki paralok ba iadonlang ha ka MDA bad kiwei ki seng sain pyrthei ba kin kyrshan lem ia ki kyrtong ka NPP ha ka elekshon Lok Sabha.
“Naba ngi la dep ban pynbna ia ka kyrteng jong ki kyrtong, nga kwah ban kyrpad la ka dei ka UDP, BJP, KHNAM ne mano mano ruh ba lada ki lah, balei ba kin ym kyrshan ia ki kyrtong ka NPP” ula ong.
