Shillong, Nailur 20 : Ki Tnad Pulit kala kem ia uwei u Surrender Hynniewtrep National Liberation Council (SHNLC) ha ka miet sngi Palei namar ka jingkynnoh donkti ban leit lum ia ka pisa na ki nongkhaii bad hehspah kiba ioh pdiang ia ka shithi dawa na ka HNLC.
Une u SHNLC u kyrteng u Sromwell Mawdoh ba 41 snem ka rta. La kem ia u napoh ka iingsah kaba don ha Umpling Dongsharum kaba hap hapoh ka Rynjah Police Station.
“U (Mawdoh) dei u dkhot HNLC bala pyndem wait hynrei ula treikam kum u Over Ground Worker (OWG) bad donkti ha ka jingleit lum ia ka pisa bala phah shithi dawa da ka HNLC. La kem ia u da ki Pulit ka Ri-Bhoi” ong uwei u Heh Pulit ha ka sngi Thohdieng.
Ki Pulit ka Jylla kila register case pyrshah ia ka jingsam shithi dawa pisa da ka HNLC sha kylleng ki nongkhaii bad ki hehspah ha Shillong.
