Tura, Jymmang 02 : Ki paidbhur ka shnong Purahasia kaba don khappud ka Ri-lum Garo, kila bom iap ia uwei u nong Bangladesh hadien ka jingiohkem ha ka miet sngi Nyngkong katba u dang prong tuh lem bad arngut kiwei pat ki paralok sha kane ka Shnong ban leh ia ki kam bymman.
Une u Nong Bangladesh u kyrteng u Monirul Hussain ba 43 snem ka rta. Ki arngut ki paralok jong u, kila ioh phet krad bad ym shym la lapdien shuh ia ki. Kane ka jingjia kala jia ha ka por 10:30 baje mynmiet.
Hadien ba shah kem, une u briew ula phla da ka ktien Garo tiak pa tiak ba ma u bad ki paralok, kila shu kynthih na u sainar khappud da ka jingthmu ban wan tuh ganja ban dih.
Ki Nongshongshnong kiba la iai shah ia ki jingpyndik jong ki nongprong tuh na khappud kiba leh ia ki kam tuh kam thiem bad rong tuh ia ki kali bad masi, ki khlem ailad shuh khlem da ai jingsneng ia une u briew.
Ki paidbhur kila bom jem ia u hashuwa ban aiti sha ki Pulit hynrei namar ka jingmynsaw jur, ki doktor ka Purakhasia kila pynbna ba ula iap shuwa ba un poi ha hospital.
Ki paidbhur ha ki shnong khappud kila apshnong mynta namar ka jingdon sa ki arngut kiwei pat kiba lait phet.
Dang lai sngi shuwa kane, arngut ki nong Bangladesh kila wan prong tuh ha Purakhasia hynrei kila shah kem noh haka 30 tarik Iaiong.
Kane ka jingiohlad jong ki nong Bangladesh ban prong tuh na khappud kala buh dak jingkylli halor ka jingpahara jong ki shipai BSF namar ha baroh artylli ki kam prong tuh na khappud la ioh ban bat da ki paidbah ym da ki BSF.
