Nongstoin, Nohprah 11 : Uwei u Nonghikai ula iap bad uwei pat ula mynsaw jur, na ka jingshah hiar thma kynsan kynsan ha ki riew runar hynne ka janmiet sngi Nyngkong ha surok na Nongstoin sha ka thain Langpih.
Kine ki Nonghikai ki dei kiba hikai ha ka Rangsapara Secondary School kaba don ha ki thain Langpih.
Kat kum ka jingiathuh ki Pulit, u Nonghikai uba khlad u kyrteng u Tengton R Sangma ba 48 snem ka rta bad uba mynsaw jur u kyrteng u Surja Kumar Chetri ba 49 snem ka rta.
La iathuh ba kine ki arngut ki nonghikai kila wan sha Nongstoin ban sei pisa na State Bank of India (SBI) jong ka skul. Kila mih na Nongstoin ha ka por janmiet da ka thuk thuk Hero Splendor AS-25-E-1324 hynrei dei haba ki poi ha shiliang ka Wah Tyrsung ha ka jaka ba long khongdong bha, ki runar ki bym lah ban ithuh bad bala tap durkhmat, kila wan da kawei ka maruti bad kila tynrah ia ka thuk thuk hashuwa ba kin mih bad bom ia kine ki arngut haduh da mynsaw jur.
La suba jur ba kine ki runar ki dei ki nonglute kiba lute ia kine ki nonghikai hashuwa ba kin khynniat noh ia ka thuk thuk sha nala.
La iathuh ba ha ka por ba ki dang khyndiat ia ka thuk thuk, kawei ka bos kaba mih na Nongstoin kala poi iaid lynti na katei ka surok bad la ong ba uwei na kine ki nonghikai ula pynsangeh ruma ia kane ka bod hapdeng ka jingmynsaw kaba jur. La ong ba dei ha kane ka por ba ki runar kila phet krad noh na katei ka jaka sha khlaw.
Ia utei u nonghikai ba mynsaw la pynkit noh sha Civil Hospital, Nongstoin ban ioh ia ka jingsumar.
Ki Pulit kila register case halor kane ka jingjia bad ka jingthwet ia kine ki runar kala iaid shakhmat.
Pule lang ia kane: Rakhe ka Meghalaya Assembly ia ka Pre-Christmas bad ki Nongtrei
Peit lang ia kane
