Shillong, Risaw 29 : U President ka BJP-Meghalaya Bah Ernest Mawrie ula ong ba ka jingpan map jong u President ka FKJGP Bah Dundee C Khongsit kam pat biang satia halor ka jingshah shoh ki nongiaid nongieng, ki Khynnah skul bad ki Nongthoh khubor hynrei dei ban mih shakhmat ban pynithuh bad aiti ia ki briew ba donkti sha ka ain.
Une u Nongialam ka BJP ula pynrem jur ia ka jingshah shoh ki nongiaid nongieng kynthup ki khynnah skul ba phong uniform bad ki nongthoh khubor ha ka rally jong ka FKJGP ba long hynnin ka sngi thohdieng ha Nongbah Shillong.
Haba pynpaw ba ka jingpan map jong u President ka FKJGP ka dei ka sienjam ha ka lynti kaba dei, ula ong pat ba kane kam pat biang satia. Ula ong b aka FKJGP ka dei ban mih shakhmat ban pynithuh bad aiti ia kine ki runar ba donkti.
Ha kajuh ka por, u Bah Ernest ula kyntu ia ki dkhot ka FKJGP ba kin ai ka jingiatreilang bad ki Pulit ha kaban ioh em ia kito kiba la paw ha ki video ba jrong kti ia ki riew paidbah.
U Bah Mawrie ula ong ba ka FKJGP ka dei ban ai bha ia ka jingiatreilang namar katto katne ki briew kiba jrong kti hynnin ka sngi, kila pynthohbria ym tang ia ka seng hynrei ia ka Jaidbynriew baroh kawei.
Kane ka jingjia kala pynthohbria ia ka kyrteng jong ka Shillong bad ka Meghalaya ha satlap ka pyrthei namar kine ki jingjia kila saphriang kum ka ding ha ki rynsan Social Media.
Ula ong ba ki Nongialam ka BJP ki khuslai bha halor ka jingthut jong ka suk ka sain ha Nongbah Shillong bad ki sngew lehrain ban iohi ia kaei kaba jia lyngba ki video.
U Bah Mawrie ula pyntip ba ula kyntu ia u Myntri kam Pohiing ban pynlong ia ka jingtohkit kabym shah liang halor kane ka jingjia bad khamtam eh ia ka kamram jong ki Pulit kiba la long tang ki nongpeit kai ia kaei kaba la jia.
“Kumno ki bor ka Sorkar kila shu long tang ki nongpeitkai ia kat kine ki jingjia ba itriem? Baroh kito kiba la pynkhamti ban ai jngiada ia ki paidbah bad ki nongkynti la donkam ban hap bishar ia ka kyrdan ba ki bat bad rai la ki dei kiba bit ne em ban bat ia ka kam, ym tang ha ka kyrdan pule hynrei ban bat ia ka kam bala bynshet ha ki?” ula ong.
Une u Nongialam ka BJP ula ong ba ka Sorkar ka dei ban buria ia kito kiba la mynsaw bad ban kem ia ki runar ba donkti. Ula kdew ruh ia ka jingdonkam ban don ka policy halor ka jingpyndonkam ia ki mask ha kum kine ki rally.
U Bah Mawrie u pyntip ba un sa iakynduh ruh ia ki Heh Pulit ban kyntu ia ki ba kum kine ki jingjia kin ym jia shuh hadien habud.
