Shillong Nailur 09: Ka Synjuk Waheh Shnong East Jaintia Hills District kala pynpaw ia ka jingbitar halor ka jingleh mynthi ka sorkar jylla ban pynbor lane hukum ia ki bor ba dei peit ban maramot noh mardor ia ka surok NH-6 bad ia ka surok Sutnga-Saipung, ki surok kiba la sniew shaba palat.
Katkum u kyrwoh na u President ka SWSEJHD, u Bah Hambertus Nongtdu, ula ong ka National Highway-6 kadei kaba iaid lyngba ia ka Jaintia Hills, naduh Soomer, West Jaintia Hills haduh Malidor, East Jaintia Hills kala jot rathai haduh katta katta ha kiba bun ki bynta bad kumba long mynta, ha kiba bun ki bynta jong katei ka surok, la iohi satang ki thliew, ki pung um ba heh bad ba rit kiba la pynthut pynjynjar shi katdei eh ia ka leit ka wan jong u paidbah.
“Ka Surok NH-6, kadei tang ma ka, u budlum jong ka leit ka wan jong ki paidbah na kylleng ki jylla ha ka ri India, khamtam eh ia kiba na Northeast India, hynrei ka jinglong jingman katkum ba ka long mynta, kane ka surok, kala buh ia ki paidbah nongleit nongwan baroh ha ka jingjynjar trah bad ruh ha ka jingma kaba khraw- na ka jingdheng kali, jingsniew kali hapdeng surok, na ka jingshem lanot kiba pang ba shitom bad ruh na ka jinglah ban mih ki jingjia ba sngewsih na ka jinghap ban iaid lyngba lane kiar ia ki thliew ki pungum kiba heh hapdeng surok” ong u Bah Hambertus Nongtdu.
U President ka Synjuk ula ong, “Kaba phylla ka long ba, ka sorkar Meghalaya ka tip bha ia rukom long rukom man jong ka surokbah NH-6 bad ka surok Sutnga-Saipung, tangba tip don aiu sha lyndet pat, kaba pynlong iaka ban shu sngap jar bad khlem leh eiei ruh em, ha ka jingiadei bad kitei ki surok tad haduh mynta ka sngi. Kane ka jingkuman jong ka sorkar jylla kumne, ka dei ka jingibeiñ bad kheiñ poh ia ki paidbah bad khamtam eh ia kiba na East Jaintia Hills kiba hap ban shah ia ka lanot man la ka sngi na ka jinglong jingman jong kitei ki surok”.
“Ban shu pynkynmaw, ha ka 2 tarik u Nailar, 2023, ki nongialam ka SWSEJHD, ki la dep ban iakynduh bad aid a ka dorkhas ia u Myntri Rangbah ka jylla, ha kaba kawei na ki mat ba hakhmat eh kaba kila iakren, ka long ban maramot noh kloi ia ka surok NH-6 bad ia ka surok Sutnga-Saipung, ha kaba u Myntri Rangbah ula kular iaka Synjuk ban leh kloi ia katei. Hynrei, mynta lah tam shibnai ym don ba maramot ei ei ruh em ia kitei ki surok, khamtam ia ka NH-6 kaba dei u thied snam jong kiba bun ki jylla ha ri India. Kane ka jingleh jong ka sorkar jylla, kala pynbitar ia u paidbah khamtam ia ka synjuk bad ia u paidbah jong ka East Jaintia Hills kat haduh ba ka synjuk ka la hap ban shim ia ka rai kaba tyngeh ia mynta,” ong u President ka synjuk.
“Ka SWSEJHD, ka phah ia ka khubor kaba shai kdar sha ka sorkar jylla ba kan ai por hapoh ar taiew thik naduh ba la pynmih ia kane ka khubor, ia ka sorkar jylla ban maramot noh ia kitei ki surok baroh ar tylli, hynrei hadien ba la kut jong kane ka por, lada jia ba ka sorkar jylla kam leh eiei ruh em ia kitei ki surok, ka synjuk, kan sa shim da kawei pat ka rai kaba tyngeh bha ban pynpei shkor ia ka sorkar jylla bad ba ynda haba kaba kum kata ka por kan jia, lada jia eiei ka bym sngewtynnad hangne hangtai, ka sorkar jylla kan sa hap hi ban shim ia ka jingkitkhlieh ha lade,” la byrthen ka SWSEJHD.
