Nongpoh, Naitung 11 : Ki Nongialam Shnong bad ki paidbah ka shnong Killing, Ri-Bhoi District, kila pynrem jur ia ka jingkynnoh wan leh donbor ki briew na Assam, kiba la leit khynra ia ki karkhana tylliar maw kiba don ha ka thain khlem ka jingtip ne jingiohbor na kibor khmih ka Shnong.
Kat kum ka jingiathuh ki Nongialam Shnong, ka kynhun ki briew na Assam kila wan rung hapoh ka Shnong ha ka sngi Thohdieng bad kila leit rung jubor sha ki karkhana tylliat maw kiba don ha ka thain da kaba kam ba ki dei ki briew ba phah ka Sorkar Assam ban pynlong ia ka jingkhynra.
Ki iathuh ba kine ki briew kila kam ruh ba kila ioh bor ban pynlong ia kane ka jingkhynra na ka Iingkashari jong ka Assam.
Ki Nongialam Shnong ki kynnoh ba ia kane ka kynhun ba na Assam la ialam da u Jitul Deka uba dei uwei na ki briew ba don bad ka Sorkar Assam.
Ki Nongthoh khubor haba ioh jingtip ia kane, kila hiar sha ka shnong Killing bad ryngkat ki Nongialam Shnong, kila pyrshang ban iakren bad u Jitul Deka hynrei une u briew ula kyntait ban ai jubab bad phet krad pynban na ka jaka bad pynkut syndon ia ka jingkhynra.
Ki jaka ba kane ka kynhun na Assam kala leit ban khynra ki kynthup ia ka jaka ba hap hapoh u pud u sam ka skulbah University of Science & Technology (USTM) bad katto katne tylli ki karkhana tylliat maw.
Ki Nongialam Shnong ka Killing kila pynrem jur ia kane ka jingwan lehdonbor bad ong ba kane kala pynkhein ia ka bor jong ka Shnong ka Thaw bad kumjuh ruh ia u pud u sam. Kila pynpaw ruh ba kane ka jingleh kine ki briew ka pynsuba jur ba ka lah ban don eiei sha lyndet tang ban iohnong ki katto katne ki heh na Assam.
Ki Nongialam Shnong kila byrngem ban sa leit buh da ka jingmudui pyrshah ia u Jitul Deka lem bad ka kynhun jong u namar kane ka kam be-ain.
