Nongpoh, Nailur 23 : Ka Ri-Bhoi District baroh kawei, kala pynpaw ia ka jingbitar ia uwei u heh ka BJP na Assam Jitul Deka namar ka jingtuklar ia ki kam jaka ha thain Killing, da kaba leit mudui mukotduma ha Iingkashari Supreme Court ba kynnoh pynjot ia ka mariang-kaba dei ka daw bah ka jingshlei um ha Guwahati.
Kane ka jingbitar ki paid Ri-Bhoi kala paw pyrthei ha ka jingialang paidbah bala pynlong da ka All Killing Dorbar Committee ha ka sngi Ba-ar ha shnong Jorbil, Killing, kaba la wan iashimbynta da ki nongmihkhmat ka Ri-Bhoi District, ki Rangbah Shnong bad ki paid nongshongshnong.
Ki paidbah kila thang ruh ia ka tyngshop jong une u bar Jylla ban pynrem ia ki jingleh jong u, khamtam ka jingtuklar ia ki kam khyndew kam shyiap jong kane ka shnong khappud ka Jylla.
Ki nongmihkhmat paidbah kiba la wan iashimbynta ha kane ka jingialang paidbah ki kynthup ia u Myntri Sorkar bad MLA/MDC ka Jirang Bah Sosthenes Sohtun, MLA ka Mawhati Bah Charles Marngar, MLA ka Umroi Bah Damabait Lamare, MLA barim ka Umroi Bah Ngaitlang Dhar, MDC ka Nongpoh Kong Rona Khymdeit, u President ka Synjuk ki Rangbah Shnong ka Ri-Bhoi District Bah BB Makdoh, Syiem ka Raid Marwet Bah Ken Syiem bad ki nongialam Sengbhalang ba kynthup ia ka FKJGP, KSU bad RBYF.
U Jitul Deka u dei u Nongialam ka BJP ha Assam uba la mudui mukotduma ha Iingkashari Supreme Court ba kynnoh pynjot mariang ha ka thain Killing kaba wanrah ia ka jingshlei um ha Guwahati bad ruh ka jingkynnoh ia ka skulbah University of Science and Technology Meghalaya (USTM) ba ka kyntur sha ki jaka khlaw-kaba la ngat ha ka kun aba T.150 klur nalor ban thungdieng biang ha ki jaka ba shah ktah kumba ka ju long baroh shi katta.
Ki nongkren ha ka jingialang, kila pynrem jur ia ka jingwan mushlia u Deka bad kynthoh ba kane ka jingmudui sha Iingkashari ka dei ka jingkwah tynjuh ia ka bor jong ka Jylla Meghalaya.
“Kine ki dei ki kam thombor bad ki kam beaiñ jong u tei u bar jylla na Assam u ba khlem da tih ne wad bniah ia ka daw jong ka jingshlei um ha Assam hynrei u la kynnoh pynban ia ki Shnong ki thaw kiba don ha khappud ka jylla Meghalaya bad Assam. Kane ka long ka bym lah ban pdiang bad ngi baroh kum ki nongshong shnong ngin hap ban iakhun tyngeh” pynpaw ki nongkren.
Na ka liang u Myntri ka Sorkar Bah Sosthenes Sohtun, ula pynpaw ia ka jingsngewkhia halor kine ki jingshah kynnoh bad pyntip, ba kum u nongmihkhmat kane ka thaiñ, u la dep ban iakynduh bad ban ia phylliew jingmut halor kane ka kam bad u Myntri Rangbah ka Jylla Conrad Sangma kumjuh ruh ia u Symbut Myntri Rangbah u Bah Prestone Tynsong ban ia kren halor kane bad ki bor ba halor ha kaba la ioh jingpynshai ruh ba ka sorkar jylla Meghalaya kan iakhun pyrshah ia kane ka jingshah kynnoh ha kaba la pynkhreh ruh lyngba ka Legal Expert ban iakhun ia kane ka jingshah mudui ha ka Supreme Court.
