Bitar ka KJCLF ia ka seng KSP ba kren pynshit niam halor ka jingjia ha Mawkynrew

Shillong, Kyllalyngkot 23: Ka Khasi Jaiñtia Christian Leaders Forum (KJCLF) ha ka sngi Palei kala pynpaw ïa ka jingbitar halor ka jingkam shukor jong ka seng Hindu Kutumba Surakshya Parishad (KSP), ba kynnoh ka jingjia ba dang shen ha Mawkynrew ka dei na ka daw jong ka jingbym lah shah ia ka niam, kaba la pyni da ki riewngeit Khristan na katei ka shnong.

Ha ka kyrwoh khubor na u Secretary jong ka KJCLF u Rev Dr EH Kharkongor ula ong, “Ka jingshisha kam long kumtei, haba ia ka jingplie ia ka Rama Krishna Mission baroh shi katta ban sdang ia ka Skul la iai shah ha ka thain. Na ki khubor bad ki dur ha ki lad pathai khubor, ym shym la don ka Balang ne ka tnad Khristan kaba la sdang ia ka jingpynklumar hynrei ki dei ki nongshong shnong jong kito ki jaka kiba la donbynta ha kaban pynsngew ki mat kiba ki sngewkhia bad ktah ia ki.

“Ka KSP kam don hok ne nongrim ban kynnoh “bym lah shah” ha kaba iadei bad ka niam khamtam eh pyrshah ia ki riewngeit Khristan ha ka jylla jong ngi. Ia katei la iohi shai kdar, ba kadei ka jingleh kaba thmu pynkhihwin ban ai ding” ula ong.

“Ka paw ba ka jingthmu jong ka KSP ka kwah ban leh kum ki kaikhlaw, kumba la ïohi ia ka jingbyrngem jongka dang shen ïa ka Sorkar Meghalaya ban “pakhang surok” halor ki mat kaba ïadei bad ka Krem Mawjymbuin. Kumta ki bor synshar ki dei ban shimkhia mardor pyrshah ia kine ki jait seng khnang ban khanglad ïa ki kam pynïapher jaitbynriew bad niam ha ka jylla jong ngi,” ong u Nongialam la KJCLF.

U Rev Kharkongor ula bynrap ruh da kaba ong, “Ka Christian Leaders Forum ka thrang ia ka jingsuk ba kan synshar ha Mawkynrew bad ba ia katei ka mat dei ban pynbeit noh mardor ban kyntiew ia ka pule puthi bad ban don ia ka jingiadei kaba iajan hapdeng ki jaidbynriew bapher bapher hapoh kane ka jylla”.