Shillong, Rymphang 10 : Ka Sorkar Pdeng kala mynjur ban bei tyngka haduh 6 tylli ki project shna surok ha Jylla kaba kot palat T. 15 hajar klur.
Kine ki surok ki kynthup ia ka Shillong–Western bypass (38 km) T. 2205 klur, Dainadubi-Darugre Williamnagar (80 km)T. 4350 klur, Mawlyngkhung Mawrynkneng (Shillong Eastern bypass), Mawryngkneng-West Jaintia Hills & Jowai bypass (75 km) T. 4100 klur, Paikan-Tura (56 km) T. 1827 klur, Phulbari-Tura (63 km) T. 740 klur bad Dudhnoi-Rongjeng-Baghmara-Dalu (150 km) T. 2400 klur.
Ia kane la pyntip hapoh ka Iingkashari Meghalaya High Court haba shong bishar ia ka PIL hynne ka sngi thohdieng.
Ia ka DPR jong ka Shillong-Western Bypass ka pynkhreh mynta ha ka jingpynkhreh bad ka DPR jong ka Shillong Eastern Bypass ka dang don hapdeng ka jingbishar bad ka DPR ia ki saw tylli kiwei pat ki dang iaid shakhmat ha ka jingpynkhreh.
Ka Iingkashari kala ong ba la paw shai ba ki surok kiba kongsan ha Jylla ki dei kiba la pynshna na ka song pisa jong ka Sorkar Pdeng.
Ka ong ba kane kan iarap ia ka Jylla ban lang pynlut kham bun ha ki State Road bad ki Highway na kito kiba la khmih bad tei da ka NHAI lane ka NHIDCL.
Kane ka PIL ka dei kaba la mudui da u Arnold G Momin halor ka jingshna ia ka surok hapdeng ka Chiminmingre bad ka Kakwa Duragre.
U Chief Engineer ka PWD (Road) dang shen ula phah ia ka jingtyrwa halor ka jingshna, siang maw bad siang rong ia ka surok na Jakopgre sha Kakwa Duragre, kaba jngai kumba 7.629 Km.
Ka Iingkashari kala buh ban bishar biang ia kane ka mukotduma ha ka 24 tarik u Lber.
