Shillong, Rymphang 03: U Myntri ka tnad Soil & Water Conservation u Marcuise N Marak, ula pynbna ba ka sorkar jylla kan tei haduh 532 tylli ki pung pynlang um hapoh jong ka Climate-Adaptive Community-Based Water Harvesting Project.
Ia kane ka projek yn bei tyngka da ka Asian Development Bank (ADB) kaba la dep ruh ban khot ia ka tender bad la khmih lynti ba ka jingpyntrei ia ki kam ki jam kin sdang noh mynta u bnai ha East Khasi Hills District.
Haba iakren bad ki nongthohi khubor, u Marcuise Marak ula pynthikna da kaba ong, “Ka hap hapoh ka tnad Soil and Water Conservation bad ia katei ka projek la khot da ka Climate-Adaptive and Community-Based Water Harvesting Project. Ka dei kaba la bei tyngka da ka ADB bad la dep ban khot tender. Ka jingpyntrei ia kine ki project kan sa sdang noh shen bad ka jingpynkhreh ia ka Work Order ka dang iaid shakhmat”.
U Myntri ula pyntip ba ha ka wat kaba nyngkong, ka project kan long ia ka nongbah Shillong, East Khasi Hills district, bad la dep ban pynmih ia ka tender bad lah dep ban pynbeit ia ki kam namar ba ka donkam ba ioh ia ka jingmynjur na ka ADB.
“Shisien ba ka ADB kala ai iaka jingmynjur, ngin sa aiti noh ia ka kam sha ki kontraktor ne kompani kiba la shah jied. Hadien kane yn sa pyniar ia ka jingtreikam jong kane ka projek ha rilum Garo ruh. Baroh kiei kiei ki long kiba la pynkhreh bad shen ngin sa sdang noh shen ia kane ka projek” ula ong.
U Myntri ula batai ruh ha kaba iadei bad ka jingkhot tender, “Shisien ba ka ADB kala ai
jingmynjur ia baroh ki projek, baroh ki kontraktor kiba la thep tender yn sa pdiang. Ka jingkhot tender ka kynthup ia ki ar tylli ki bynta kawei kadei ka Technical bad kawei pat kadei ka Financial. Shisien ba la pyndep ia kitei kiei kiei baroh ngin sa sdang noh mardor ia ka projek”.
Haba kylli halor ka jingbuh por ban sdang ia ka projek, u Myntri ula ong, “La kumno kumno, ngi lah ban sdang ia katei ka projek ha u bnai Rymphang. Ngi don jingkyrmen ban ioh sdang noh”.
Ha kaba iadei bad ki projek ha East Khasi Hills District, u Myntri ula ong, “Naka bynta ka East Khasi Hills district baroh kawei ki don bun tylli ki projek. Ia mynta la dep ban khot tender ha kylleng ki jaka”.
Ha kaba iadei bad ka jingbuh por ban pyndep ia ka [rojek, u Marcuise Marak ula ong, “Ngin ai por kumba 24 haduh 36 bnai ban pyndep ia ka projek. Ka ADB kan sa khmih bniah ia ka jingpyniaid shakhmat ia ki kam ki jam jong ka projek bad ki bor sorkar bad ka tnad Soil and Water Conservation ruh kin sa khmih bniah lang ia ka jingpyntrei ia ki kam.
Ka jingshim ia ka sienjam ban pyllang ia ka um ka dei kaba laleh da ka jingthmu ban pynthikna ba ka Jylla kan ym kyrduh um bad kan lah kyrda ruh na ka jingkylla ka suinbneng hapoh ka jylla.
