Shillong, Feb 3: Ka Langsning FC kala pynrem ia ka Ryntih FC da 2-1 ha ka jingiakhun ha ka OC Blue Shillong Premier League ba long hynne ka sngi Nyngkong ha SSA Stadium, First Ground, Polo.
U Dauruhipaia Pale ula thep ia ka kol ha ka 35 minit na ka bynta ka Langsning hynrei ha ka minit kaba 69 u Basuklang Bina ula thep ia ka kol na ka bynta ka Ryntih ban pyniakhiad ia ka jingiakhun.
Hynrei hashwa ban kut ka jingialehkai ha ka minit kaba 87 u Dajiedlang Wanshnong ula thep ia ka kol kaba la pynthikna syndon ia ka Langsning ba kan khur ia ka jingjop.
Ka Langsning kala ialehkai bha ha ka kylla step ha kaba u Dauruhipaia ula ioh thep ia ka kol bad tang hadien jong ka jingioh thep kol, u Basuklang ula ioh ia ka kabu ban thep kol ban pyniakhaid ia ka jingiakhun hynrei u nongap kol ka Langsning u Rajat Paul Lyngdoh ula ioh ban iada ia ka bol ba kan ym ioh rung shapoh kol.
Ka Ryntih kala pyrshang ban ialehkai ha kaba u Andy Mawthoh ula ioh ia ka kabu kaba biang bha hynrei ka bol kaba ula shut kam shym la leit rung shapoh kol. Ka Ryntih kala ioh ban pyniakhiad lyngba ka jingthep kol u Basuklang.
Watla ka jingiakhun kala sdang ban itynnad biang hynrei u Dajiedlang ula ioh ban thep ia ka kol kaba itynnad na ka bynta ka Langsning kaba la pynartatien ia ki nongialehkai ka Ryntih ba kin dang lah ban pynphai kylla sa shi kol.
Ki nongialehkai ka Ryntih watla ka por kala jan kut artad kila pyrshang ban tur shakhmat ha kaba u Leversharp Syiemlieh ula shut ia ka bol hynrei u Rajat Paul ula rynsied ban iada ia katei ka bol ba kan ym ioh rung shapoh kol bad ban pynthikna ba ka Langsning kan khur ia ka jingjop.
Ka Langsning mynta kala don ha ka kyrdan kaba 4 bad kamai 17 point hynrei ka Ryntih kala mad 11 sien ia ka jingshah rem bad ka don ha trai duh da kaba kamai tang 3 point.
Ka jingialehkai ha ka sngi Baar kan long hapdeng ka Nongrim Hills SC pyrshah ia ka Laitkor SC ha ka por 2:30 mynsngi. Ka Laitkor ka don ha ka kyrdan kaba 5 bad ioh 16 point, katba ka Nongrim Hills ka don ha ka kyrdan kaba 7 bad kala ioh 13 point.
