Nongpoh, Jymmang 22: Ka Dorbar Pyllun jong ka Shnong Erpakon kala rai ban beh shnong noh ia baroh ki bar jylla kiba wan trei bylla bad kiba sah wai ruh kumjuh napoh u pud u sam jong ka Shnong.
Kane ka rai kala mih na ka jingialang Executive Committee ka Dorbar Shnong, kaba shong jingialang hynne ka sngi Balang, kaba la iakren sani halor ka jingshah pyniap u Bah Kyrmen Lyngdoh Nonglait ha uwei u bar jylla ba trei Dhaba, kaba jia ha ka 11 tarik Jymmang.
Une u bar jylla u kyrteng u Raju Rajbhar uba trei bylla ha ka dhaba bala tip kum ka RN Sharma Hotel. Ki Pulit kila kem ia u Raju ha ka sngi kaba bud hadien ka jingtohkit kaba bniah bha ia ka jingdonkti jong u ha kane ka kam bymman.
Ka Dorbar Shnong bala ialam da u Rangbah Shnong M Thongni bad u Secretary Shnong Bah Lamborlin Kharshilot, kala rai ban leh da kaba tyngeh ia kaei kaba la jia bad ba mait tyrut noh da kaba beh shnong noh shisyndon ia baroh ki bar jylla kiba shong sahwai ne kiba wan trei bylla hapoh u pud u sam jong ka Shnong Erpakon.
Ha kajuh ka por, ka Dorbar Shnong kala rai ruh ba u trai ka Building ba aiwai ban buh ia ka RN Sharma Hotel, ba un bthah ia u trai ka Hotel ba un mih noh bad ban ialam lut ia baroh ki nongbylla bar jylla hapoh ka shibnai.
Nalor kane, ka shnong kala rai ba kan pyrrkhing noh ia ka jingai NoC ia ki bar jylla kiba don jingthmu ban wan sengkam sengjam hapoh u pud u sam jong ka Dorbar Shnong Erpakon.
