Shillong Nailar 18: Ka Khasi Students’ Union Laban Circle bad ka KSU Mawprem Circle ha ka sngi Nyngkong kila ioh bat ia ki 4 ngut ki Muslim kiba la wan rung be-aiñ shapoh ka jylla bad ka KSU kala phah leit phai noh ia kine ki briew sha ka jaka kaba ki wan.
U General Secretary ka KSU Laban Circle u samla Jason Laloo ula pyntip ba kine ki 4 ngut ki Muslim ki kynthup ïa 2 ngut ki khynnah.
Ula iathuh ba ka seng kala lap nyngkong ia kawei ka longkmie Muslim na Laststop, Laban katba ka dang khrong pisa bad ka khun na ki dukan bad haba ka seng kala tohkit bniah, la lap ba kidei kiba dang shu wan sha Shillong dang 2 sngi bad kam shim la don ia ka EPIC ban pynshisha ïa ka jinglong trai shnong lait noh tang ka Aadhar Card ba ioh na Uttar Pradesh.
Ka KSU kala pyntip noh sha ka Laban PS bad hapoh thanad kane ka longkmie kala phla ba ka sah ha ka thain Cantonment ha Jhalupara bad mar kumta na ka liang ki pulit ka Laban ki lah phah noh ïa kane ka briew sha Jhalupara Outpost ha ryngkat ka jingsynran ki dkhot ka KSU.
“Ynda la ialam ia kane ka longkmie sha ka iing sah kaba ha Cantonment, Jhalupara la lap ba ka don ia u lok bad ka khun jong ka, kiba sah beaiñ ha ka jaka jongka Cantonment da kaba shna da ka iing tap shiliang khlem da ioh jingbit” ula ong.
Ka Seng ha ka jingsynran lang ki pulit ka Jhalupara Outpost, kila beh noh ïa ki da kaba pynkit ha ki kali ba kin leit phai noh sha ka shnong kaba ki wan.
“Ka Seng ka sngewbynñiaw ba ka Anti-Infiltration Cell jong ki tnad pulit ka long kiba synjor haduh katta katta ba kum kine ki briew ki ioh rung suk bad sah beaiñ sha ka jylla” ong u Jason Laloo badbynrap, “Ka Seng ka dawa ban pynkhlaiñ ïa ki tnad jong ka Anti-Infiltration Cell bad ka Sorkar kadei ban shimkhia halor ka mat jong ka jingwan rung kyrthep ki mynder ri lem kumta ka Seng kam banse ban shim hi ïa ka aiñ ha la ka kti ban ïada ïa ka ri bad jaitbynriew na ka jingwan rung kyrthep ki poi ei”.
