Shillong, Sep 16: Ka Senior Women’s Selection Committee ka Meghalaya Cricket Association kala pynbna ia ka thup jong ki 15 ngut ki nongialehkai ha ka kynhun ka jylla ban iashimbynta ha ka BCCI’s Senior Women’s T20 Trophy plate group, kaban sdang ha u bnai ban wan ha Tripura.
Ia kane ka kynhun yn ialam da ka Debasmita Dutta, kaban ioh ia ka jingkyrshan na ka Daiaka E Warjri kum ka vice-captain. Ia baroh ki support staff la jied lut kiba dei kiba shong basah hahapoh ka jylla, ha kaba u Mackie D Blah un long u Head Coach.
Ka Tournament kan sdang ha ka 8 tarik u Risaw bad ia ki jingialehkai yn pynlong ha Agartala bad ha ka plate group ki kynthup ia ka Mizoram, Nagaland, Sikkim, Arunachal Pradesh bad ka Manipur. Ki artylli ki kynhun kiban wan hakhmat na ka Group Stage kin ioh rung ne qualify sha ka plate final.
Ka kynhun jong ka Meghalaya kan sdang ia ka jingpynkhreh ne ka preparatory camp n aka bynta katei ka Tournament kaban sdang naduh ka 21 tarik u Nailur haduh ka 5 tarik u Risaw ha Nongkhrah, Nongpoh.
Ka kynhun ki nongialehkai ka Meghalaya ki kynthup ia ka Luiza Tamang, Daiaka E Warjri (VC), Shruti Kr Ray, Indariakor Kharwanniang, Debasmita Dutta (C), Ruby Chettri, Solina Jaba, Ajima A Sangma, Sandria K Momin, Monica L Phawa (WK), Riticia Nongbet, Rebeldalis Syiemlieh, Janka Marak (WK), Monycable Marbaniang bad ka Ankita Sharma.
Katba ki Standbys ki kynthup ia ka Dubleen D Nengnong, Ritreki Pohshna, Pilika Marak, Blaridahun Dkhar, Deiphibapynshngain L Mawnai, katba ki Support staff ki kynthup ia u Mackie D Blah (head coach), Eugene K Kharsyntiew (assistant coach), Marybalahun Sawkmie (physio), Darishesha Mawroh (trainer) bad ka Baiahunlang Mylliemngap (manager).
