Aizawl, Nohprah 20: U Lat ka jylla Mizoram u Dr Hari Babu Kambhampati mynta ka sngi ula pyntian smai na ka bynta ka jingshimti kam ia ki sawngut ki Myntri ka Cabinet kiba kynthup ia u K. Lalrinliana; Lalchhandama Ralte; Lalruatkima bad u Er. Lalrinawma.
La pynlong ia kane ka jingialang pyntian smai hadien ba ka Chief Secretary ka jylla ka Dr. Renu Sharma ka la pan ia ka jingbit na ka bynta ka jingpyniaid shakhmat na u Lat. Bad hadien u Lat ka jylla ula pyntian smai na ka bynta ki sawngut ki myntri thymmai.
Ha kane ka jingialang pyntian smai la wan iashim bynta ruh da u Myntri Rangbah (CM) ka jylla u Zoramthanga, Dy. CM u Tawnluia, Lamphang ka Mizoram Legislative Assembly u Lalrinliana Sailo lem bad kiwei pat ki myntri, ki MLAs nalor kiwei pat ki riew pawkhmat bad ki heh sorkar.
U K. Lalrinliana; u Lalchhandama Ralte bad u Lalruatkima kila shah pynrung ha ka kynhun myntri cabinet na ka kam myntri sorkar ka jylla.
U Lalrinawma uba la iehnoh kam dang shen kum u Symbud Lamphang ka Mizoram Legislative Assembly u dei tang ma u ka durkhmat bathymmai hapoh ka kynhun myntri ha kaba ula shah pynkhamti ia ka tnat Social Welfare & Tribal Affairs, Excise & Narcotics, Sericulture, bad Animal Husbandry & Veterinary.
