Shillong, Lber 19 : U Myntri Rangbah ka Jylla Conrad K Sangma ula pynpaw ba ki jingkulmar ha ri-lum Garo kila nang duna bad ka jingim ki paidbah ba man ka sngi kala sdang ban long biang kumba ju long, watla ka Sorkar ka dang peit pyrman bha ban tehlakam ia ki kam kiban pynheh ia ka jingkulmar.
Haba iakren bad ki nongthoh khubor hadien ka jingiakynduh ia u Lat ka Jylla CH Vijayashankar ha ka sngi Palei, u Conrad ula iathuh ba ki jingkulmar kila nang duna, lait noh ki katto katne ki jingjia ba shisien lano eh.
“Ka jinglong ba jai jai kala wan phai – ki briew mynta kila iaid shakhmat bad ka jingim ba man ka sngi. Hadien ba bishar ia ka jinglong jingman, ngi la weng noh ruh ia ka hukum ba khang ia ka kor internet. Hynrei ngi dang buddien bha ia ka jinglong jingman….ngi lah peitngor bha ban pynthikna ia ka jinglong jingman kumba ju long” ula ong.
U Conrad ula ai ka jingbatai kaba bniah ia u Lat halor ka jinglong jingman kaba don ha ri-lum Garo, kaba mih na ka jingiakhih ba poi sha ka jingiashoh iadat, pyrshah ia ka jingiashimbynta jong ki bar jylla ha ka elekshon GHADC, ia kaba la pynkynriah noh dang shen.
“Jan artaiew mynta, Nga la don ha ri-lum Garo…ha baroh kine ki sngi, ngi la lah ban iakren bad u Lat lyngba ka phone bad kumta, nga sngew dei ba nga hap wan ban batai ia u halor ka jinglong jingman ba mynta khamtam ha ri-lum Garo bad ruh ki jingjia bapher bapher kiba lam sha ka jingthut ka shong suk shongsain” ula ong.
Ia u Myntri Rangbah la synran da u Symbud Myntri Rangbah ba khmih ia ki kam Pohiing Bah Prestone Tynsong.
“Ngi la batai bniah ia baroh kiei kiei kiba jia ia u Lat ka Jylla” ong u CM haba bynrap ba u Lat “u kham tip bha ia kiei kiba jia”.
Halor ka jingkem briew na ki jingkulmar, u Conrad ula ong ba ka jingkem briew ka dei ka kam jong ki Pulit.
“Haba iadei bad ka jingkem, ngi la kren shai halor kane ba ka dei beit thik ka kamram ka Tnad Pulit bad haba pynshong nongrim ia ki sakhi bad ki rule kiba don, ki Pulit kila leh ia ki kam…Ngam don jingtip haduh katno ngut kila kem, ngam don jingtip ruh mano kita kiba shah kem namar ka dei ka kam ki Pulit bad ki Pulit kila shim ia kane ka sienjam kat kum ka ain bad kat kum ki sakhi. Nga tharai u SP un kham lah ban jubab bha ia kane”.
