Shillong, Nailar 26 : U Myntri Rangbah ka Jylla Conrad K Sangma ula pynpaw ba ka Sorkar jong u, kala kut jingmut hok ban wad ia ki lad ki lynti ha kaban lah pynbeit noh ia ki jingiakajia pud bad ka Assam ban pynthikna ia ka jingsuk kaba shirta.
Haba kren sha ki lad pathai khubor ha ka sngi Ba-ar, u Conrad ula ong ba kala don ka jingsangeh ha ka jingiakren khappud hapdeng ka Meghalaya bad Assam la 46 tylli ki snem.
“Khatduh, ngi (Sorkar MDA) la sdang ia ka jingiakren. Nga sngew ba phi lah ban ai ka burom ia kaei kaba ngi leh. Kam dei kaba suk, ka dei kaba jyrwit jyrwat bha. Kaei kaba la sangeh la 46 snem, ngi la pyrshang ban pynbha ia ka bad iai bteng ban leh eiei halor kane” ula ong.
“Ha ka sien ba nyngkong ka don ka Sorkar kaba la trei hok shisha halor kane ka kam. Kam ju don satia ha ki snem bala leit. Hato ngi lah ban wad ia ki lynti ban pynbeit ia baroh kiei kiei, lehse em. Kam dei kaba suk hynrei ngi la pyrshang”. Hooid, ngin ai lut kat kaba don namar ngi kwah ia ka jingsuk kaba neh shirta” bynrap u Myntri Rangbah.
Haba kren halor ka jingjia ba dang shen ha Maikhuli, Ri-Bhoi District, u Conrad ula ong ba ki don ki jing sngewkhia bad ki jingjia kiba jia hynrei la lah pat ban tehlakam ia ka jinglong jingman ha ka thain.
U Conrad ula ban jur ba ka kam khappud ka dei kaba jyrwit jyrwat bad kaba ktah ia ka jingsngew briew, kaba don ka histori bala iaid la palat 52 nem, bad ban wad ia ka lynti iapynbeit ba neh shirta ka donkam ia ka por bad ki jingpyrshang.
U Myntri Rangbah ula pynpaw ba kala don ka jingiasngewthuh jingmut hapdeng ki bor pyniaid jong ki artylli ki Jylla bad ki paidbah, kaba la iarap ban lah pynbeit ia ki katto katne ki jingeh.
