Shillong Lber 26: Kum shi bynta jong ka jingthmu ban pynduna ia ka jingkhapngiah ka sor Shillong, ka sorkar jylla kan sa pynkynriah noh ia ka Police Reserve na Jail Road sha Tynring.
Ia katei la pyntip hadien ba la wai ka jingialang jong ka Kynhun Myntri kaba la long ha ka sngi Balang, da u Myntri Sorkar uba long ruh u Nongaiktien ka Sorkar Jylla u Bah Paul Lyngdoh uba la ong, “Ban pynduna ia ka jingkhapngiah ka sor Shillong, ia ka Police Reserve yn pynkynriah noh bad yn buh noh ha Tynring kaba don hapoh jongka New Shillong Township. Ka Kynhun Myntri kala ai jingmynjur ia kane hynne ka sngi”.
“Yn mang ia ka jaka kaba 50 akar na ka bynta ban tei ia ka Police Reserve kaba thymmai ha Tynring bad ia katei ka jaka kan long ruh kum ka lynti hapdeng ka Administrative City bad ka Knowledge City jong ka New Shillong Township,” ula ong.
Ula iathuh, ba ki kam ki jam kin sdang noh shen ban tei ia ka Police Reserve kaba thymmai.
“Ka jingthmu ka long ban pynduna ia ka jingkhapngiah ia ka thain bad ia ka Jail ruh yn sa pynkynriah noh bad ka jingtyrwa kaei kaban leh ia katei ka jaka ynda kala lait, yn sa shimkhia da ka tnad pynroi sor. Ngin sdang shwa ban pynkynriah sha New Shillong bad ngin sa rai ia kaei kaban leh ia ka jaka jong ka Police Reserve ynda kala thylli bad ia ka Jail yn sa pynkynriah bad ngin sa rai namar ki jingdonkam jong ka nongbah ki long kiba bun bha bad ia kitei yn sa shimkhia da ka tnad kaba dei khmih” ula ong shuh shuh.
