Shillong Jymmang 14: U Symbud Myntri Rangbah ka jylla u Bah Sniawbhalang Dhar ula ong ba ka Sorkar kala dep ban ithuh ia ki katto katne tylli ki jaka ha ka nongbah Shillong ban pynkynriah noh ia kiba shong die madan kiba shong dukan ha Khyndailad, Motphran bad ha Laitumkhrah.
“Ngi la dep ithuh ia lai-saw tylli ki jaka ban gin ioh pynwandur pynwandar bha khnang ba ngin lah ban pynkynriah ia ki nongshong dukan madan ym tang na Khyndailad hynrei na Motphrah bad Laitumkhrah ruh kumjuh” ong u Symbud Myntri Rangbah haba iakren bad ki nongthoh khubor hynne ka sngi Ba-ar.
Kat kum ka jingong u Myntri, ka Tnad Urban Affairs kala pyrshang ban peit ia ki jaka ha ki Parking Lot jong ka MUDA hynrei ym pat shim rai satia ha kano ka jaka ban pynkynriah ia ki nongshong dukan madan kiba don kumba 200-300 ngut kiba la dep ithuh da ka Sorkar.
Halor ka jingpyntip u Myntri kam jngohkai ba ka Sorkar kan pynkynriah ia ki dukan madan na Khyndailad hapoh ka taiew pdeng jong u Jylliew, u Symbud Myntri Rangbah ula kubur ba kane ka dei ka jingpyrshang jong ka Sorkar hynrei ula ong pat “Imat kan dang kham shimpor sa katto katne bnai namar kiba bun ki kam ba hap leh”.
Ula ong ba ka daw hi ka dei namar ka Tnad ka dang peit jaka lang ban pynkynriah ia ki dukan madan na Motphrah bad na Laitumkhrah.
Ula ong ba kane ka dei shibynta na ka sienjam ban wanrah ia ka jingkylluid ki lynti syngkien bad ka jingpynitynnad ia ka nongbah Shillong.
U pyntip ba ka Tnad Urban Affairs kala dep shong jingialang bad ki nongdir madan ha kaba da kawei ka jingmut, ki nongdie madan ruh kila kwah ban ioh noh ia ka jaka shong die jingdie kaba biang.
