Shillong, Rymphang 02: Kum shibynta na ka jingpyrshang jong ka Sorkar ban shna ia ki madan ialehkai kiba janai ha ki shnong Nongkyndong, u Myntri Rangbah ka Jylla Conrad K Sangma ha ka sngi Thohdieng ula buh ia u maw nongrim ban shna ia ka madan Artificial Turf ha madan Riangdo, West Khasi Hills District.
Kane ka madan ialehkai phutbol ha Riangdo ka dei ka madan ba kongsan bha ym tang ia ka Riangdo hynrei wat ia ki thain kiba marjan ba kin pynlong ia ki lympung ialehkai bapher bapher.
Ia kane ka project la mang ban pynlut haduh T. 10 klur ban shna pynbha bad kyntiew kyrdan ia kane ka madan, ia kaba la buhpor ban pyndep hapoh ka 18 bnai.
Ka madan ialehkai phutbol ka Riangdo, kan dei ruh ka madan ialehkai ba nyngkong eh ka West Khasi Hills ban shna da ka artificial turf.
Haba ai jingkren, u Myntri Rangbah ka Jylla ula ong “Nga tip ba bun ki briew kiba don ha la ki kam ki jam , kila ju ialehkai phutbol ha kane ka madan hynrei la 52 snem kam shym la don satia ka jingkynshew pisa ban pynbha ia kane ka madan”.
Ula ban jur ruh ba ka Sorkar kala shna ia bun tylli ki stadium bad ki madan ialehkai ha kine ki san snem bala leit noh ban ia kaei kaba la leh ha kine ki 45 snem baroh lang. U ong, kane ka phalang ia ka jingkut jingmut jong ka Sorkar na ka bynta ka bha ka miat jong ki samla bad ban plie lad ia ki ba kin nang kiew shaphrang ha ki kam ialehkai.
Haba pynpaw ia ka jingsarong ia ka jingjop ka kynhun ialehkai phutbol ka Meghalaya ha ka Khelo India Youth Games 2023 da ka jingioh ia ka takma ksiar, u Myntri Rangbah ula ong “Ka dei ka khyllipmat ba sngew sarong ia ngi baroh ba ki samla jong ngi kila wanrah ia ka nam bad ia ka cup sha ka Jylla jong ngi bad kane ka pyni ruh ba ki khun ki kti jong ngi kim dei kiba duna”.
U Mytri Rangbah ula kren ruh halor ki prokam ai jingiarap song pisa, ki khusnam song pisa bad ka scholarshop jong ka Sorkar ia ki nongioh takma khnang ba ki samla kin lah ban nang pynleit jingmut ban long tista ha ki kam ialehkai kaba ki don sap.
“Ngin ym kut tang ha ka jingshna madan ialehkai hynrei ban iatreilang ruh bad ki Sports Association bapher bapher ban kyntiew ia ki kam ialehkai” ula ong.
