Shillong, Iaiong 07: U Myntri Rangbah ka Jylla Conrad K Sangma, hynne ka sngi Nyngkong, ula ban jur ia ka jingdonkam ba ki Jylla ka thain Shatei Lam Mihngi ki dei ban iatreilang ha kaban kyntiew ia ki kam jngohkai ha ka thain.
“Ki nongshangkai pyrthei na kylleng ka Ri India bad ki ri ka pyrthei ki ithuh ia ka thain Shatei Lam Mihngi kum “Kawei”…kumta ka long kaba kongsan ba ki Jylla kin iatreilang iajan bha ha kaban kyntiew ia ka kam jngohkai” ula ong.
U Conrad ula pynpaw ia kane haba pyniaid ia ka jingialang High Level Task Force ba nyngkong eh halor ki kam jngohkai ba long hynne ka sngi, kaba la iashimbynta da u Myntri ka DoNER Jyotiraditya Scindia, u Myntri Rangbah ka Sikkim Prem Singh Tamang, u Myntri Rangbah ka Tripura Dr Manik Saha bad ki Heh Ophisar na ka Sorkar Pdeng bad ki Jylla.
Ha kane ka jingialang la iakren sani halor ki rukom treikam ki ban sei pyrthei ia ka spah kam jngohkai jong kane ka thain Shatei Lam Mihngi.
U Conrad ula iaroh ia u Myntri ka DoNER uba la shimkhia ban thaw ia ka Task Force, kaba ula niew kum ka sienjam ba kongsan bha ban kyntiew ia ki kam jngohkai ha ka thain Shatei Lam Mihngi baroh kawei. Ula ong ba ka thain Shatei Lam Mihngi kala wanrah ia ka Industrial Policy bad kala plie lynti ia ka jingroi jong ki karkhana.
Haba kren ha ka jingialang, u Myntri ka DoNER J Scindia ula ong “Ka thain ka lah ban shim kabu ia ka spah pateng la pateng bad ka jingitynnad ka mariang ban pyntyllun ia ka roi ka par kaba neh, ban kyntiew ia ka ioh ka kot ki nongshong shnong bad pynkha ia ka lad iohkam iohjam”.
Ka Task Force kaba la thaw da ka DoNER Ministry bala khlieh da u Myntri Rangbah ka Meghalaya Conrad K Sangma, kan bishar ia ki lad ki lynti ban kyntiew ia ka kam jngohkai jong ka thain, ban aijingmut ia ki sienjam ba donkam ban shim, ban ithuh ia ki jingduna bad ban ai jingmut ia ka lynti iaid na ka bynta ka roi ka par ba pura ha ka kam jngohkai hapoh ka thain.
Ha ka jingialang, u Myntri ka DoNER ula ai jingmut ba dei ban bishar ia ka rukom treikam (model) jong ka Ri Thailand, Cambodia, Vietnam bad kiwei ki Ri South Asia ban kyntiew ia ki kam jngohkai bad ruh ban thaw iala ka jong ka rukom treikam ka ban nang kyntiew shuh shuh ia ki kam jngohkai jong ka thain.
Ia kane ka Task Force la thaw hadien ka 72nd Plenary jong ka North Eastern Council (NEC) ba long ha u bnai Naiwieng 2024 ha Agartala, Tripura. Ia kane ka Task Force la thaw da ka DoNER Ministry ha ryngkat ka jingiatreilang bad ka Tourism Ministry.
