Shillong, Lber 06: Ka Directorate of Information and Public Relations (DIPR), kala pynlong ia ka Conclave halor ka Phang “Emerging Trends in Public Communication – Redefining the Role of DIPR” ha ka 5 tarik u Lber ha State Convention Centre, Shillong.
Ka Myntri ka tnad IPR Dr. M Ampareen Lyngdoh, kum ka kongsan kala ban jur iaka kamram kaba kongsan jong ka Directorate of Information and Public Relations (DIPR) ban pynthikna ia ka jingsam ia ki jingtip jong ka sorkar sha ki paid nongshong shnong.
Kala ong, “Ka kamram jong ka DIPR ka donkam ban don noh ia ka jingmut kaba thymmai. Ha kane ka pyrthei kaba iaid sted, ka long kaba kongsan ba kane ka tnad kan shim ia ki lad ki lynti katkum ka jingkylla ka por ha ka jingpynsaphriang ia ki jingtip, ban pynthikna ba ki sienjam kiba la shim da ka sorkar bad ki skhim kin poi shaduh ki jaka kiba don sha kyndong, sha man la ki nongshong shnong la ki don ha kino kino ki jaka”.
Ka Myntri kala ong ba kamram jong jong ka DIPR ka long kaba kongsan bha ha kaban pynsngewthuh ia ki paidbah shaphang ki skhim sorkar kaba ki paidbah ki lah ban ioh.
“Haba ia kitei ki skhim lah ban iohi, kumta ka bor kaba shisha jongka DIPR kadei ka jinglah ban saphriang ia ki jingtip sha kylleng bad kaba treikam bha. Kam dei eh tang ban iohi ia ka jingdon, hynrei ban pynthikna ba ka khubor yn ioh ban pdiang, sngewthuh bad ban leh ia kaba donkam” la ong ka Myntri.
Ka Dr. Lyngdoh kala ban jur iaka kamram jong ka DIPR ha ka kam shakri ia u paidbah ka long kaba kongsan bha.
“Ngi don ia ka jingkitkhlieh kaba khraw ban nang pyniar bun shah ia ka jingsam ia ki jingpyntip, ban pynkup bor ia ki nongshong shnong da kaba ai ia ki jingtip kaba ki donkam ban ioh ia ki skhim bad ia ki jingdonkam ki bapher” kala ong.
Ha kane ka jingialang la iadonlang u Dr. Shakil P. Ahammed u Additional Chief Secretary ka jylla kum u symbud kongsan, ka Kong Patricia Mukhim kaba long ka Editor jong ka Shillong Times, u Vijay Kumar Mantri u Commissioner & Secretary ka IPR, u Bah B.S. Sohliya, Secretary & Director ka I&PR bad kiwei kiwei ki heh ophisar jong ka DIPR
