Shillong, 25 July : Ka Committee on Public Undertakings jong ka Meghalaya Legislative Assembly kala banjur ia ka jingdonkam ban siew ha ka por kaba biang ia ka ram ne Loan kaba la shim da ki karkhana ban pynthikna ba ka don ka jingkhlain ha ka ioh ka kot jong ka Meghalaya Industrial Development Corporation Ltd. (MIDC) bad ban kyrshan ia ka jingpyniaid shakhmat ia ka jingroi ki karkhana ha ka jylla.
Kane kala paw lyngba ka jingjurip kaba la pynlong da ka Committee hynne ka sngi Palei, ha kylleng ki karkhana kiba don ha ka Byrnihat Industrial Area, Ri-Bhoi District. Ia kane ka jingjurip la ialam da u Chairman jongka Committee u Brening A. Sangma ryngkat bad ki MLA kiba kynthup ia u Marthon Sangma, Heavingstone Kharpran, Dr. Celestine Lyngdoh, Bah Banteidor Lyngdoh bad u Bah Pius Marwein.
Ka jingthmu jong kane ka jingjurip ka long ban khmih ia ka rukom siew biang ia ka ram kaba la ai da ka MIDC. Ka Committee kala khmih bniah ia ki karkhana ki bym shim la siew thikna ia ka ram ne kiba la shu siew malu mala bad kala kyntu ia ki ba kidei ban siew pyndep noh mardor ia ka ram kaba ki dang sah.
Ka M/s CMJ Breweries Pvt. Ltd. kala ioh ia ka jingiaroh halor ka jingbatskhem ha ka jingsiew ia ka ram hynrei kala pynpaw pat ia ka jingsngewkhia halor ka
M/s Greystone Strips Pvt. Ltd. bad ka M/s Greystone Smetters Pvt. Ltd., ki bym shim la siew satia ia ka ram bad kila siew tang khyndiat. Ka Committee kala ong ba kan sa pan ia ka jingpynshai na u Managing Director jong ka kompani.
Ha ka Byrnihat Hotel Cum Shopping Complex, ka Committee kala shem ba kala don ka jingpynslem ha kaban shna ia ki jingtei namar ka jingbym ioh thikna ia ka bording elektrik. Kane kala ktah ia kane ka projek ba kan lah ban treikam bad ban siew ia ka ram. Ka Committee kala pynthikna ba kan shimkhia ia kane ka mat bad ki bor kiba dei khmih ban iarap ha kaban pynbeit ia ka jingbym biang ka bording elektrik.
Ka Committee kala iengskhem ruh ia ka jingkongsan ban don ia ka jingkitkhlieh ha ka jingpyndonkam ia ka pisa u paidbah bad ka kular ban bteng ia ka jingkhmih bniah ia kum kitei ki projek.
 bad ban kyrshan ia ka jingpyniaid shakhmat ia ka jingroi ki karkhana ha ka jylla.){kind=link}