Nongpoh, Kyllalyngkot 04: Ban pynrhem ia ka mynsiem iatylli kum ki nongshong shnong, ka Dorbar Shnong Mawtnum, Nongpoh ka la pynlong ia ka prokram ban pdiang sngewbha ia u snem thymmai 2024 bad pynlong ruh ia ka jingiabam khana shnong bad ki prokram ia put ia tem.
La wan ban pynshngainlang ia kane ka sngi, da u Dr. C Lyngdoh, MLA ka Umsning Konstituensi, ha ka jingiadonlang u Bah Badhok Nongmalieh, Rangbah Shnong ka Mawtnum, ki riew rangbah ba kynthup ia u Bah Rocky Marwein, u Bah Successful Lyngdoh nalor kiwei kiwei.
Ha kane ka sngi, ka Dorbar Shnong Mawtnum ka la ioh ruh ban ai mynsiem ia ki samla pule ka shnong kiba la leh bha ha ki jingpule jong ki da kaba pynkup burom ia ki saw ngut ki samla jong ka shnong kiba la pyndep ia ki jingpule ha ki kyrdan bapher bapher.
U Dr. C. Lyngdoh, haba ai jingkren u la ai khublei snem thymmai ia baroh ki nongshong shnong bad ruh ban ai jingiaroh ia ka Executive Committee jong ka Dorbar Shnong Mawtnum kiba la lah biang ban shim ia ka sienjam ban lum ban lang ia ki para nongshong shnong ban wanrah ia ka jingiaieid iatylli da kaba pynlong ia kum kane ka prokram kaba kyrpang ban pdiang ia u snem thymmai.
