Nongpoh, Kyllalyngkot 17: Kum shibynta ban pynneh pynsah iaka niam ka rukom bad iaki riti ki dustur kumba la buh naduh mynbarim, ki longshuwa manshuwa, mynta ka sngi ka Raid Marwet Sohjer Committee ka la ioh biang ban sdang iaka jinglehniam Sohjer kaba 4 hadien ba hap pynsangeh noh namar ka jingwan lynshop ka khlam covid 19.
Ban pyniphuh iphieng ïaka katei ka lehñiam leh rukom, ka Marwet Sohjer Committee kala buh ruh shibun ki jingïakop kiba kynthup naduh ka jingiashad bad rwai tynrai, ka jingialehkai ball jong ki heprit, ki khun samla bad ki rangbah, ka jingkyntip ktien bad kiwei kiwei bad ha kine ki saw sngi kin wan ruh ki nongrwai kiba pawnam jong ka jylla ki ban sa wan ban pynshong shit ia kane ka tamasa.
Ïa katei ka lehñiam Sohjer la wan ban plie pyrda noh da u Bah Victor Ranee MDC ka Nongpoh kum u kongsan haka jingdonlang u Paiem Ken Syiem, Syiem ka Raid Marwet, ki Longsan Man San jong ka Raid bad kiwei kiwei ki riew rangbah.
Haba kren sha ki lad pathai khubor u Syiem ka Raid Marwet u Pa’iem Ken Syiem ,u la ong ba Katei ka jinglehñiam ka dei kaba ju leh shisien shisnem da ki khun ki hajar jong ka Raid Marwet ban ainguh aidem ïa u Blei nongbuh nongthaw, ba un kyrkhu kyrdoh ïaki khun ki hajar baroh shisnem khamtam hadien ka jingioh kheit ïa u soh ba nyngkong jong ka jingtrei shitom jong ki baroh shisnem, khamtam ban pynim ïaka kolshor tynrai bala buh naduh u mynbarim.
U la ong ruh ha katei ka lehñiam bad ka tamasa ka ban neh saw sngi lynter ngin ioh ruh ban sakhi ïaka jingriew spah jong ka kolshor tynrai jong ka Raid Marwet
Shuh shuh u la ong ba mynta ka sngi ka dei tang ka dak jong ka jingplie ia kane ka ka tamasa kaba 4 sngi, ïaka jinglehniam kiba kynthup naduh ka kñia ka khriam ka jingpyni iaki riam ki rukom lyngba ka shad bad ka rwai tynrai yn sa pyndep haka 19 tarik mynta u bnai kaba dei ka sngi ba 3 jong katei ka lehñiam ha kaba ki khun ki hajar bad ki paid nongshong Shnong jong ka Raid Marwet kin wan ban shim bynta bad ban sakhi lang ha katei ka sngi.
