Nongpoh, Kyllalyngkot 17: Ki ar ngut ki heprit na ka jylla ba kynthup uwei na Ri Bhoi District bad uwei pat na East Khasi Hills District kin leit ban pdiang ïa ka khusnam riewshlur (National Bravery Award) ha Nongbah Delhi ban pynkhamti ïa kane ka khusnam riewshlur da u Myntri rangbah ka ri, u Naredra Modi.
Kine ki ar ngut ki heprit ban ioh pdiang ïa ka khusnam riewshlur ki kynthup ïa u Heprit Wanlambok Rani na ka Shnong Umden Arka ha Ri Bhoi bad uwei pat u dei u Heprit Forme Khongji na ka Shnong Umkrem (Dawki) na East Khasi Hills District.
Kum ban pynpaw paidbah, kane ka khusnam riewshlur ba la tip ha ka ktien Nongwei kum ka ‘National Bravery Award’ ka dei ka khusnam ba la ai lyngba ka Indian Council for Child Welfare ha kaba man la u snem ka ju sam ïa kine ki khusnam halor ki kam shlur jong ki heprit ha ki bynta bapher bapher bad kaba long ruh kum ka jingpynshlur ïa ki heprit kiba hapoh ka rta kaba 18 snem shapoh.
Kine ki ar ngut ki heprit ki la long kiba bit ban ioh pdaing ïa kitei ki khusnam riewshlur na myntri rangbah ka ri India, u Narendra Modi, ka dei ruh halor ki kam shlur ba ki la aiti ïa la ka jingim ban pynlait im ïa kiwei, halor ka jingngam jyllop ha ka wah. Kum ki heprit hadien ba ki la iohi ba don kiba la ngam jyllop ha ka wah khlem jingtieng jingsmiej ki la leit ban ai jingïarap na ka bynta ban pynlait im ïa kito kiba ngap jylla ha ki ar tylli ki jaka kata kawei ha ka wah Umiam bad kawei pat ha ka Kshaid Umkrem.
Kumba la ioh jingtip, kine ki 2 ngut ki heprit na ka jylla Meghalaya mynta ka sngi ki la mih na la ïing ryngkat ka jingkyrkhu kyrdoh ki kmie ki kpa bad kiba haïing hasem ban leit sha Nongbah Delhi na ka bynta ban pdaing ïa katei ka khusnam riewshlur na u Myntri rangbah ka ri ha ka 24 tarik u Kyllalyngkot ha Nongbah Delhi.
