Bamduh ka ding ia ka karkhana pynmih tusok ha Ri-Bhoi

Nongpoh, K’lyngkot 13 : Ka ding kaba klang bha, kala bamduh ia ka karkhana pynmih tusok (mattress) bala tip kum ka Ummadat Foam Industries ha ka janmiet sngi Ba-ar ha ka thain Amjok, Byrnihat, Ri-Bhoi District.

Kane ka jingjia kala jia ha ka por kumba 3 duna bad la iathuh ba ka jingkem ding ka dei na ka kor (machine) ba pyndonkam ban ot ia ki tusok namar ka jingthut ha ka bording (short circuit).

Kat kum ka khubor, kane ka karkhana ka dei jong u Adarsh Junjunwala. La iathuh ba ha kane ka por ba kem ding, jan baroh ki nongtrei ka karkhana ki dang shu dep ban ia bam ja sngi.

Na kane ka jingkem ding ka kor, ki phylliah ding kila ioh ban pur sha kiwei pat ki bynta jong ka karkhana haduh ba ka ding kala ieng bad klang bha. Lah antad ba ka jingduh nong na kane ka jingjia kala kot da ki klur tyngka.

U Rangbah Shnong ka Amjok Bah Raju Jyrwa u iathuh ba hadien ka jingioh jingtip ia kane ka jingjia, ula hiar mar mar ban leit jurip sha katei ka jaka hynrei hashuwa ba un poi, na ka liang ki Pulit ka Byrnihat Police Outpost bad ki Pulit pynlip ding kila lah ban iakhun ia ka ding bad ban iada ia ka jingpur sha kiwei pat ki jingtei kiba don marjan kane ka karkhana.