New Delhi, June 9: U Narendra Modi hynne ka sngi u Blei, ula bam smai kum u Myntri Rangbahduh ka ri India kaba lai sien lynter ha ka jingialang kaba la long ha Rashtrapati Bhavan, Delhi.
Ka President ka ri ka Droupadi Murmu kala pynbamsmai ia u Modi ryngkat bad ia ka kynhun myntri kaba kynthup ia ki 30 ngut ki Myntri ka sorkar pdeng, 5 ngut ki Myntri khynnah kiba iohbat ban khmih hi halade ia ki tnad sorkar bad ia ki 36 ngut ki Myntri Khynnah.
Na ka thaiñ shatei lammihngi kiba la ioh ban long myntri ki kynthup ia u Sarbananda Sonowal, Kiren Rijiju bad Pabitra Margherita.
Ki Members of Parliament (MP) kiba la bamsmai kum ki Myntri Sorkar ki kynthup ia ki nongialam ka BJP u JP Nadda, Nitin Gadkari, Rajnath Singh, Amit Shah, Nirmala Sitharaman, Piyush Goyal bad u Jyotiraditya Scindia.Nalor kane u HD Kumaraswamy JD(S), Chirag Paswan (LJP), Ram Nath Thakur JD(U) bad u Jitan Ram Manji (HAM), Jayant Chaudhary (RLD), Anupriya Patel (Apna Dal (Soneylal)), Rammohan Naidu (TDP) bad u Chandra Sekhar Pemmasani (TDP).
Ki heh ki haiñ na ki ri bapher bapher kiba la wan ban sakhi ia kane ka jingpyntiansmai ki kynthup ia u Myntri Rangbahduh ka Bhutan u Tshering Tobgay, u President ka Maldives u Mohamed Muizzu, Myntri Rangbahduh ka Nepal Pushpa Kamal Dahal ‘Prachanda’, ka u Myntri Rangbahduh ka Bangladesh ka Sheikh Hasina, u u Myntri Rangbahduh ka Mauritius u Pravind Kumar Jugnauth bad kiwei kiwei.
