Shillong, Lber 10: Kawei ka karkhana ot dieng kaba don ha 7th Mile Upper Shillong kala pluh kynsan bad ka ding kaba la klang bha, kala bamduh ia kane ka karkhana.
Katei ka jingjia kala jia haka por 11:30 mynmiet jong ka sngi Palei bad haduh mynta ym pat lah ban tip ia ka daw tynrai jong ka jingpluh jong katei ka karkhana ot dieng.
Katkum ki khubor ba la iohlum, la iathuh ba katei ka karkhana kadei kaba la longtrai da u Bah Arbes Kharsati bad ha katei ka jingpluh, ki mashin bad ki dieng kiba shongdor da ki lak tyngka, kila shah bamduh ha ka ding kaba la klang bha.
Haba ki pulit pynlip ding kila ioh jingtip halor katei ka jingjia, kila leit ban tem ia kane ka ding. Kila don 4 tylli ki kali pynlip ding kiba la poi sha katei ka jaka bad hadien ar kynta tam jong ka jingiakhun kila lah ban pynlip ia katei ka ding hynrei kim shym la lah pat ban iada ia katei ka karkhana na ka jingshah bamduh ha ki thylliej ding.
La antad ba ki mashin kiba shongdor kumba T.25-30 lak kila shah pynjulor ha katei ka ding kaba la klang bha.
