Shillong, Rymphang 09 : Ka ding kaba klang bha kala bamduh ia kawei ka Iing jong ki Khunswet hynne ka step 9 tarik Rymphang ha ka shnong Rasong, kaba hap hapoh ka Nongkrem Constituency.
Kane ka jingjia kala jia ha ka por kumba 2 baje step mynstep bad ka dei ka Iing ba sah ki saw ngut ki shipara kiba dei ki Khunswet (bym don Kmie don Kpa shuh).
Kane ka Shnong ka dei kaba hap ban iaid kjat lyngba ka jaka jngohkai ba pawnam bala tip kum ka Laitlum Viewpoint.
Kine ki shipara ki dei na ka kur Kharmu bad la kyrshan ia ki da ki lai ngut ki Kni. Donbok ba ha kane ka jingjia, iwei na kine ki shipara ila kyndit bad ila kyrsiew lut ia baroh ban iamih sha bar lait noh u para shynrang uba la mynsaw malu mala na ka jingdei ki phylliah ding.
La iathuh ba ka daw jong ka jingpluh ka dei na ka jingsah ka ding ba dang rhem ha dpei jong katei ka iing, kaba la lam sha ka jingpur bad bam lut ia ki jingdon jingem jong kitei ki Khunswet.
U MDC ba mynta ka Nongkrem Bah Lambor Malngiang haba ioh jingtip ia kane ka jingjia, ula hiar wut wut sha katei ka shnong ryngkat ki tiar ki tar bad ki marbam ban leit ai jingiarap ia kine ki shipara.
Nalor kane, u Bah Lambor ula noh jingiarap ruh da ka song pisa baT.25 hajar sha kine ki shipara ba kin ioh ban thied ia ki tin sopiing haba kyntu ruh ia ki bor shnong ban iarap lem katba lah ia kine ki khunswet.
Kiba la iadonlang ha kane ka jingiakynduh ia kine ki khunswet, ki kynthup ia ki lai ngut ki Kni lem bad u Sirdar ka shnong Rasong Bah R Mylliem.
.){kind=link}