Guwahati, Nohprah 09 :Ha kawei pat ka jingkynthoh pyrshah ia u heh nongialam ka AIUDF u Badruddin Ajmal, na ka liang u Myntri Rangbah (CM) ka Assam u Himanta Biswa Sarma hynnin ka sngi Palei ula buh ka jingkylli sha u Badruddin da kaba ong balei ki shynrang kim shym la shah kyntu ban pyndonkam ia ka hijab ne ka jain tap khlieh, lada ia ki kynthei la hukum ba kin leh ia kane.
U Sarma ula ong ruh ba kalong kaba donkam ban pynkylla ia ka rukom ne ka system ha kaba u shynrang u ju iathoh shongkurim haduh lai ne sawngut ki kynthei na ka bynta ban pynioh ia ki hok jong ki kynthei Muslim.
“Kan ym don kano kano ka hok na ka bynta u briew uba shong ba sah ha India ba un iathoh shongkurim haduh lai ne sawngut ki kynthei khlem ka jingiakhlad sanshyieng ia ki lok barim, bad ngin hap ban pynkylla ia kaba kum kane ka system. Lada ia ki kynthei Muslim la kyntu ba kin pyndonkam ia ka hijab, balei kane kam treikam kumjuh ia ki shynrang?” ong u Sarma ha ka jingialang paidbah.
“Ki kynthei Muslim kim lah ban pule ha ki skul bad ki shynrang Muslim kin iathoh haduh 2 ne laingut ki kynthei, ngi long pyrshah ia kane ka system.Ngi kwah ia ka jingialong mar kumjuh,” ong u CM Sarma.
Nalor kata u Sarma ula kynthoh tyngeh ruh ia u heh nongialam jong ka All India United Democratic Front (AIUDF) u Ajmal halor ki jingkren kynthoh ki jong u pyrshah ia ki Hindu da kaba ong ba lada u Ajmal u long uba kloi ban pynlut pynsep na ka bynta ka bam ka dih bad ka pule puthi bad ka sumar sukher na ka bynta kito ki khynnah kumta ruh ki longkmie ki lah ban kha khun haduh 20 ne 25 ngut.
“U Ajmal u dei ban kiar na kiba kum kine ki jingkren kynthoh halor katno ngut ban kha khun lada um lah ban siew ia ki jinglut jingsep,” ong shuh shuh u Sarma.Nalor kata u Sarma ula ong ruh ba ia ki kynthei ym dei satia ban ianujor bad ki karkhana pynkha khun.“Dei ban burom ia ki kynthei bad dei ban pynioh ia ki juh ki hok kumba long ki shynrang,’ ong u Sarma.
U Sarma hynnin ka sngi Palei ula don ha Marigaon na ka bynta ka jingbuh ia u mawnongrim na ka bynta ka Morigaon Medical College.
Ha katei kajuh ka sngi u CM Sarma ula buh ruh ia u mawnongrim na ka bynta ki laitylli kiwei pat ki projek kiba heh, kata na ka bynta ka Morigaon-Jagiroad kaba pyniasoh ia ka jingkieng ka ban dang tei ka ban kot ha ka jinglut kaba T. 75 klur halor jong ka wah Kapili, T.100 ba la mang na ka bynta ka jingtei ia ki lynti surok PWD bad T.63 klur na ka bynta ka jingpyntreikam lyngba ka tnat Water Resources.
