Shillong, Iaiong 04: Ha ka sien kaba nyngkong eh ka Meghalaya Board of School Education (MBoSE) kan pynbna ia ka resol jong ka eksamin SSLC (Klas X) ha u Iaiong ha ka jaka jong u bnai Jylliew.
Ia ka resol mynta ka snem yn pynmih ha ka 5 tarik u Iaiong ha ka por 11 baje mynstep.
Kane ka jingpynbna kloi ia ka resol kadei namar ka jingmih jong ka kyndon ain kaba thymmai kaba la wanrah da ka sorkar jylla. Naduh mynta u snem ka MBoSE kan pynlong arsien iaka eksamin Klas X.
Ka eksam kaba nyngkong kan long ha u bnai Rymphang-Lber bad ki khynnah pule kiba phiel kin ioh biang sa ia kawei ka lad ban ialeh iaka eksamin ha u bnai Jymmang.
Ka jingthmu jong kane ka jingpynkylla ka long ban iarap ia ki khynnah pule ba kin ioh kloi ia ka resol ka jongki khnang ba kin lah ban shim ia ka ‘Admission’ ne ban leit thep klas ha ki skul ne college khlem kano kano ka jingpynslem.
Lah ban kdew, u Myntri ka pule puthi ha u Nailar jong u snem ba la dep ula ong, ka eksamin kaba nyngkong kan long ha u bnai Rymphang ne dang kloi ha u bnai Lber bad ka eksamin ka baar kadei ban ailad ia ki khynnah kiba phiel ha ki katto katne ne baroh ki sobjek ban ialeh biang ia katei ka eksamin hapoh jong ka shi bnai ne ar bnai kaban long ha u bnai Jymmang.
U Myntri ka pule puthi ula ong ba kane ka sienjam kadei ruh kaba iaid ryngkat bad ka jingiaid shakhmat ha ka jingpyntreikam ia ka National Education Policy (NEP) bad la pynwandur ban kyrshan ia ki khynnah pule ban pynduna ia ka jingduh ei ia ka por hapdeng jong ka jingpyrshang.
Ka Kynhun Myntri kala ai jingmynjur ia kane ka rai ban pynkut noh ia ka ‘Optional Paper lane ka ‘Best of Five Papers’ naduh ka samoi pule jongu snem 2026-2027, kaba mut ba baroh ki khynnah pule naduh u snem 2026-2027 kin hap ban ‘Pass’ ha baroh 6 tylli ki sobjek ha katei ka eksamin.
 kan pynbna ia ka resol jong ka eksamin SSLC (Klas X) ha u Iaiong ha ka jaka jong u bnai Jylliew.){kind=link}