Ba shimpor ka ILP : Rai ka KHADC ban pyndonkam da ki ain Hima ban tehlakam ia jingrung kyrthep ki mynder

Shillong Naitung 25: U Deputy CEM ka Khasi Hills Autonomous District Council (KHADC) u bah P.N Syiem hynne ka sngi ula pyntip baka Executive Committee (EC) ka la rai ban wanrah ia ka jingpynkylla thymmai ha ki ain kiba la don lypa khnang ban lah tehlakam ia ka jingrung kyrtlep ki briew ba nabar hapoh u pud u sam jong ka District Council.

Haba kren sha ki lad pathai khubor u bah P.N Syiem ula ong ba ia kane ka rai la shim hadien ba la iohi ba ka sorkar pdeng kam shym la leh eiei haba iadei bad ka jingdawa ban wanrah ia ka Inner Line Permit ha kane ka jylla.

“Kumba ngi tip ba ki Sengbhalang ki la iakhun ban ioh ia ka ILP ban iada ia ka jingrung jingmih ki briew ba nabar ha kane ka jylla, hynrei ka sorkar pdeng kam shym la leh eiei tad haduh mynta” la ong u bah P.N Syiem.

U bah P.N Syiem ula ong “Na ka liang jong ngi kum ka District Council, ngi la rai ha ka EC ba ha ki Ain ba la don lypa kum ha ka Elaka Administration Act, ka KHADC Mylliem Appointment of Syiem Deputy Syiem Hima Maharam bad kiwei de ki Ain kiba la don lypa, ngin wanrah ia ki jingpynthymmai ne ka jingpynkylla khnang ban don ia ka jingkhein ba biang ha ka rung ka mih ki briew ba nabar”.

“Kane ka mut haba ki briew ki rung ha ka Raid ne Hima, ki dei ban don ia ki kyndon kiba ki Hima ki hap ban treikam katkum ki Ain jong ngi. Haba rung ne shong ha shnong lada dei u nongtrei sorkar ne u nongtrei bylla, dei ban don ki rukom treikam ba u Rangbah dong bad u Rangbah shnong u hap ban pyndep katkum ki Ain bad ki kyndon jong ngi” ula bynrap.

U Bah PN Syiem ula ong ba lyngba ka jingwanrah ia ka jingpynkylla thymmai ia ki Ain, kan iarap shibun ban peit ban pyrkhing ia ka jingrung kyrtlep ki briew hapoh u pud u sam jong ka District council.

Pule ruh: Dkhat jubor u Samla iala ka jingim da kaba pynbthei bomb IED ha Smit