Shillong, Nailar 06 : Ka bor pyniaid District ka East Khasi Hills kala pynjari ia ka korphiw miet ha ki shnong khappud ka Ri Bangladesh ban khanglad ia ka jingwan rung beain jong ki briew na shiliang pud namar ka jingkulmar bad ki kam umsnam ha kane ka ri ba markhap.
Ka District Magistrate Kong RM Kurbah ha ka hukum kala ong “..haba pyntreikam ia ka bor bala pynkup ha ka nga kat kumka kyndon 163 BNSS, la pynjari ia ka korphiw miet naduh 6 baje janmiet haduh 6 baje mynstep ha ki jaka ba hap hapoh ka 200 meter n aka zero line (khappud Bangladesh) ba khang pyrshah ia ka jingiaid jingieng ki briew ha ki jaka khappud da ka jingthmu ban jam ia u pud u sam bad ka Bangladesh lane rung tuh sha khappud ka India”.
Ka hukum ka khang ruh kala khang ruh ia ka jingialum paidbah ba 5 ngut ne palat khlem da ioh bor ne rah tiar pynmynsaw kiba lah ban pyndonkam kum ka tiar ialeh kynthup ia ki dieng/rod bad ki maw ha khappud ka India-Bangladesh nalor ki kam be-ain, ka khaii tuh ia ki masi, ki mar ki mata, u kwai, tympew, kha tyrkhong, bidi, cigarette, chai, slasha bad kiwei kiwei.
“Namar ka jinglong kyrkieh jong ka kam, kane ka hukum kan treikam mardor bad kan iai treikam tad haduh da pynmih da kawei pat ka hukum” kala ong.
Ka District Magistrate kala ong ba ia kane ka hukum la pynmih namar ka jinglong jingman ka suk ka sain ha Bangladesh bad la antad ba ka lah ban don beit ka jingjam pud da ki runar, ki dkhot ki kynhun kaikhlaw, ki nongkhaii beain ha khappud ka India-Bangladesh.
Ka khappud ka East Khasi Hills namar ka jingbym pat ker sainar shiah, ka dei kaba lah ban jur bha ka jingrung tuh ki briew, ki dkhot jong ki kynhun runar kynthup ki kynhun kaikhlaw kiba lah ban ialum bun briew hajan ka khappud ha ka por mynmiet ban leh ia ki kam pyntriem.
La ong ba lada ym lah ban khanglad ia kum kine ki kam bymman bad tehlakam ia ka jingwan rung tuh, ka lah ban ktah iaka suk ka shngain hapoh ka District, ka Jylla bad ka Ri baroh kawei.
