Shillong, Naiwieng 24 : Namar ka jingnang bun ki briew ba ioh ia ka jingpang HUV/AIDS hapoh ka Jylla, ki Nongthaw Ain ka Jylla/MLA kila smai ban ai ka jingkyrshan sha ki briew ba im ryngkat ka jingpang HIV ne People Living with HIV (PLHIV) nalor ban pynkhlain ia ki jingialap ban pynsngewthuh paidbah ia ki jingma jong kane ka jingpang.
Kane ka sur ki MLA kala mih na ka jingialang ba nyngkong jong ka Governing Body jong ka Meghalaya Legislative Forum on HIV/AIDS bala pyniaid da u Lamphang ka Iingdorbar Thaw Ain Thomas A Sangma hynne ka sngi Thohdieng ha Conference Room ka Pinewood Hotel, Shillong.
U Myntri Rangbah ka Jylla Conrad K Sangma uba dei u Chief Patron ka Meghalaya Legislator Forun on HIV/AID, u Symbud Lamphang Timothi D Shira, ka Myntri ka Koit ka Khiah Dr Ampareen Lyngdoh, Nongialam ka Liang Pyrshah Ronnie V Lyngdoh bad ki MLA, kila iashimbynta ha kane ka jingialang.
Positive deliberations were held in the Meghalaya Legislators’ Forum on HIV & Aids.
The figures presented today on HIV & AIDS patients in the state is very alarming and therefore, efforts are being made through Government agencies for preventative measures, promotion of… pic.twitter.com/0U27sks3RE
— Conrad K Sangma (@SangmaConrad) November 24, 2023
Ka jingialang kala iakren halor ki hynriew tylli ki mat ba iadei bad ki briew ba im ha ryngkat ka jingpang HIV, ka jingpynioh ia kine ki briew ia ki lad jingsumar, ki prokram ban ai jingkyrshan ia ki, ban pyniohkam bad kyntiew ia ka sap treikam ba ki don, ban ai jinghikai bad ialap paidbah, kyrshan da ki jingbam tei met bad iarap ha ki kam ain.
Haba iakren bad ki nongthoh khubor, u Lamphang ula pyntip ba ka Forum ka kynthup ia ki nongthaw ain ban iakhun pyr shah ia ka jingpang da kaba iaid ialap ban pynsngewthuh ia ki paidbah shaphang ka jingpang.
Ula pyntip ruh ba ka jingialang kala iakren ruh ym tang ia ka koit ka khiah ki PLHIC hynrei ia ka jingim jong ki ha ka imlang sahlang, ka ioh ka kot, ka dak thohbria bad kiwei kiwei ha kaba ki Nongthaw Ain ki lah ban iarap ia kine ki briew bad ban wan ialam ia ki ban im ryngkat ha ka imlang sahlang.
U pyntip ba ki Nongthaw ain ka Jylla kila mynjur ban noh synniang na ki skhim jong ki lane ka Discretionary Grant ban kyrshan ia ki PLHIV. Nalor kane, ha ka jingialang, la rai ruh ba baroh ki 60 ngut ki MLA kin iashimbynta shitrhem hapoh ka Forum namar ka jingkyrshan jong ki kan iarap bha ha kaban iakhun ia kane ka jingpang.
U Lamphang ula pyntip ba ka jingdon jong ki nongpang HUV ha Meghalaya kala kham heh wat ia ka National Average. Ula pyntip ruh ba u Myntri Rangbah ka Jylla Conrad K Sangma ula pynbna ba ka Sorkar kala pynkhreh mynta da ka Mission ban pynduna ia ka jingsaphriang ka jingpang HIV hapoh ka Jylla.
