Shillong, Naitung 29 : Ka FKJGP seng kmie kala ujor sha ka Deputy commissioner ka East Khasi hills ba kynnoh ba ki Gas Distributor Agency kila ohdor ia ka tyndong lyer shet jingshet palat ia ka dor ba buh da ka Indian Oil company (IOC).
“Kiba bun ki briew kila phone ia ngi bad phah tuklar lang halor kane ka jingleh tam ki Gas Agency” ong u Bah Reginald Thabah, Asst General secretary ka FKJGP sengkmie lyngba ka kyrwoh.
“Ta ka daw ngi kyntu ia phi ban phah ia ki Ophisar ba dei khmih ba kin leit tohkit ia kane ka kam” ula bynrap.
Une u Nongialam ka FKJGP ula ong ba lada ki Ophisar ki lap ia kane ka jingleh tam, ka bor District ka dei ban leh da kaba tyngeh ia kine ki Gas Agency.
“Lada ka Ophis kam shimkhia ia kane ka kam, ngim don lynti pat da kumwei bad ka seng kan leit ban tohkit hi dalade” ula byrngem.
U Bah Reginald ula kyntu ruh ia ka DC ba kan ai jingpyntip lypa (pre notice) ia ka dor jong ka lyer tyndong shet jingshet manla u bnai hashwa ban sam paidbah lyngba ki lad pathai khubor khnang ba ki paidbah kin iatip ia ka dor ka mur.
