Dang iakren ka Sorkar ban kyntiew kyrdan ia ki Skul Secondary bad sdang ia ka klas mynstep
Shillong, Iaiong 10 : U Myntri ka Tnad Pule Puthi Rakkam A Sangma ha ka sngi Palei, ula pyntip ba ka Sorkar kala rai ban pynsangeh shuwa ia ka jingrung klas da ki jaka pule ban wanrah ia ka rukom treikam kaba la buh ryntih ban pynthikna ba ka jingpynrung klas ka dei ban long ia baroh ki samla pule, kiba pass ia ka eksam Secondary School Leaving Certificate (SSLC).
Kat kum ka jingong jong u, ka Sorkar ka dang pynkhreh ruh ban kyntiew kyrdan ia ki skul Secondary sha ki skul Higher Secondary ha baroh kawei ka Jylla hadien ka jingkiew kynsan ka jingpass jong ki samla pule ha ka eksam SSLC kaba kot haduh 87.10%, ka record thymmai-kaba tam ia ka percentage ba mynshem snem ba 55.80% bad ruh ia ka pass percentage jong ki 10 snem bala leit noh.
Lah ban kdew hangne, kane ka rai jong ka Sorkar ka dei ruh kaba la shim namar haduh 13% duna ki samla pule ba shah bat ha ka eksam SSLC bala dep, kin ioh lad biang ban iakhun sa shisien ia ka eksam ka ban long mynta u bnai Iaiong-Jymmang.
Haba iakren bad ki nongthoh khubor, u Rakkam ula ong ba ka Sorkar kam iohi satia ia kano kano ka jingeh ban pynrung klas ia ki samla pule ha Shillong namar ka percentage kiba pass ka long kumba ju long manla u snem ba 70 haduh 80% hynrei la khmih lynti ba ka jingeh kan jur eh ha ki District nongkyndong.
“Ngi la iakynduh bad baroh ki khlieh nongpyniaid ki jaka pule. Ngan sa iakynduh ia ki Deputy Commissioner jong ki District bapher bapher ha Ri-lum Garo ha ka taiew ban wan” ula pyntip.
Ula pyntip ruh ba ka Sorkar kala shim ia ka sienjam ban kyntiew kyrdan noh ia ki skul Secondary sha ki skul Higher Secondary.
“Ngi la pynshlur ban kyntu ia ki jaka pule ba ioh grant-in-aid ba kin pynbun ia ka jingshim klas (pynrung klas) bad ban sdang ruh ia ka jingshim klas mynstep (morning section) ha ki katto katne ki jaka pule Sorkar” ong u Rakkam haba bynrap “Ngi kwah ban don ia ka rukom treikam bala buh ryntih bha namar kin don sa 20,000 tam ki samla pule mynta u snem. Ngi dang pynkhreh ia ki jingdonkam baroh ba kumno ngin pynrung klas ia baroh. Ngim kwah ban iohi ba ki samla pule jong ngi kin duh rung klas”.
Haba pyntip ba la pynsangeh mynta ia ka jingpynrung klas, u Myntri ula ong “Ngi dang leh ia kane ka kam bad ngi la pynsangeh ia ka jingpynrung klas ha kiba bun ki jaka pule hadien ba ngi ioh jingkhein haduh katno ngi lah ban pynrung klas ia ki samla pule ha ki District-East Khasi Hills, Ri-Bhoi, Jowai. Ngi dang pynkhreh ia ka rukom treikam kaba la buh ryntuh khang ban gin lah ban pyntip ba katne ngi lah ban pynrung klas ia ki samla pule hangne bad hangtai”.
Haba kylli, u Rakkam ula ong ba ki don sa 4 tylli ki Secondary School ki ban sa kyntiew kyrdan noh sha ka Higher Secondary ba kynthup ia 3 tylli ki Ri-lum Khasi bad Jaintia bad kawei ka Ri-lum Garo.
“Ngi la iakynduh ia ki jaka pule bapher bapher ban iakren la ka jingpynrung klas kala dap, balei ba ym sdang noh sa ia ka klas step lane wanrah la ka jong ka section. Ngin pynthikna ba baroh kin ioh rung klas lut ha ka Jylla” ula ong.
.){kind=link}