Dhupdhara, Jymmang 12 : Ka jingiabam ia ka dohkha ba kylla bih ha ka Iing iap briew ha shnong Mariampur, kala shim ia ka jingim jong kawei ka Longkmie bad palat 100 ngut ki nongshongshnong kila poi sha Hospital ha Goalpara District.
Kane ka Longkmie kaba iap ka kyrteng ka Renubala Sangma, ba 52 snem ka rta, kaba la leit sngewlem sha ka Iingiap briew ha Mariampur, ka shnong Garo kaba don ha Assam ha khappud bad ka shnong Adokgre, North Garo Hills.
Kane kala jia ha ka sngi ba leit ontep ia uba iap bad ha kane ka sngi, bun bah ki nongshongshnong ka Adokgre bad Kharkutta na North Garo Hills bad na Nongladaw ha Ri-Bhoi, kiba don kumba 160 na Ri-lum Garo bad 40 ngut na Ri-Bhoi kila poi hospital namar ka jingprie, pynhiar bad suhkpoh kynsan kynsan.
Kine ki nongpang kila pyntip ba kane ka jingkem pang jong ki ka dei na ka jingbam ia ka dohkha kaba la pynkhreh da kane ka Iingiap, kaba tyrwa bam sha baroh ki nongwan sngewlem shuwa ba kin leit phai shala iing.
Kat kum ka jingong u Joint Director (Health) ka Assam Paresh Kalita, palat 100 ngut ki nongshongshnong kila shah sumar ha ki hospital bapher bapher kynthup ha Bikali Model Hospital, Ranjuli Hospital, Dudhnai Hospital bad Goalpara Civil Hospital.
Uwei u Nongshongshnong na kane ka Shnong, ula ujor da ka ejahar ha Dhupdhara Police Station bad ki Pulit kila register case hapoh ka kyndon 328 IPC bad sdang ruh ia ka jingtohkit. Ki Pulit kila leit lum ia ki sakhi bad ia kane ka bam ha kaba la phah ia ki sha Forensic Laboratory ban lap ia ki daw halor ka jingkylla bih ka dohkha.
U MLA ka Dudhnai Constituency Jadob Swargiary, ula iakynduh ia ki nongpang bad kyrpad ia ki Doktor ban iarap ai jingsumar kat kaba don ba kin jem noh.
Kumjuh ruh ka Garo National Council (GNC), Garo Youth Council (GYC), bad Garo Woman Council (GWC), Assam zone, kila phah ia ka jingsngewlem bad dawa ban kem mardor ia ki briew ba donkti kat kum ka ain. Kila dawa ruh ban pynlong ia ka jingtohkit ha ka kyrdan kaba heh ban lah ithuh ia ki briew ba donkti bad ka daw jong kane ka jingjia.
U Kapil Rabha, u nongap jong kawei ka skul, ia uba u Khun jong u ruh ula leit sha kane ka Iing iap, u pyntip ba u Khun jong u, ula bam ia ka dohkha ba shu sdieh bad u khlem pang satia katba ki paralok kiba bam ia ka dohkha ba shet kylla kila kem pang bad hap kit mar mar sha Hospital.
