Assembly | 236 ngut kiba iohpang Japanese Encephalitis ha ki arsnem ha Jylla

Shillong, Nailur 10 : Haduh 236 ngut ki briew kila don ha Meghalaya ba ioh iaka jingpang Japanese Encephalitis (JE) ha kine ki 2 snem kiba la dep, ha kaba 89 ngut ki dei kiba la lap ha u snem 2023-2024 bad 147 ngut ha u snem 2024-2025.

Ia kane la pyntip da ka Myntri ka koit ka khiah kong Ampareen Lyngdoh haba jubab ia ka jingkylli jong ka MLA na Ampati Miani D Shira ha ka dorbar synrai hynne ka sngi Balang.
Ka Kong Ampareen kala ong ba ka JE Vaccine ka dei shi bynta jongka universal immunization program na ka bynta ki khynnah kiba ha ka rta kaba 9-11 bnai bad 16-23 bnai. Ka sorkar kala ai jingbthah ban don ka jingai dawai ha ki jaka kiba jur ha ki jingpang kiba pynsaphriang da ki pyrjong.

Kala pynpaw ia ka jingkongsan ban leit pynsngewthuh paidbah bad ki jingialang hapdeng ki tnad bapher bapher bad ki district ban iada na ka jingsaphriang jongka JE.

Ka Myntri kala pynthikna ba ka sorkar kala shimkhia ia kane ka jingpang bad kala buh ia ki Lab kiba kyrpang ban pynlong ia ka jingkhmih bniah.

Kala kdew ruh ba ka tnad kala khmih bniah ia ka jingdonkam ban don ia ki Lab ha man la ki district bad ki khmih ha kaban kyntiew ia ka jingdon ki nongtrei, kynthup ia ki microbiologists, ban kyrshan ia ka jingkhmih bniah bad ban leh ia ki Testing.

Haba kylli halor ki daw halor ka jingduna ki case ne jingjia ha Garo Hills haba ianujor bad ka Khasi bad Jaintia Hills, ka Kong Lyngdoh kala ong ba ka jingai injekshon ka jur bha ha Garo Hills. Kala banjur ba ka jingai dawai injekshon ka long kaba kongsan tam ban iada bad kala kyntu ia baroh ki dkhot jong ka iingdorbar ban pynshlur ia ki nongshong shnong ban shim ia kandawai injekshon.

Ka myntri kala pynthikna ba ka sorkar ka dang trei shitom ha kaban iakhun ia ka JE bad kala shim ia ka sienjam ban jur ka jingpeitngor, Testing bad jingpynsngewthuh paidbah.
Kala pynpaw ruh ba ka sorkar kala bei tyngka ia ki samla ban shimkhia ha ka jingduna ki nongtrei ha ki jaka kaba ka jingpang JE ka jur bha.