Guwahati, Lber 25: Bun ngut ki nongmihkhmat bad ki nongialam jong ka seng Congress na Assam ki la shah kem noh ha Guwahati mynta ka sngi hadien ka jingpynlong ia ka jingiakhih kaba jur ban pynpaw pyrshah halor ka jingshah mait kyrteng jong u Rahul Gandhi kum u MP ka Lok Sabha.
Kine ki nongiakhih pyrshah ki la kam ba ka BJP ka la pynjot pynpra noh ia ka synshar paidbah ne democracy.
Bun ngut ki nongialam kaba kynthup ia u Debabrata Saikia, Rokibul Hussain bad katto katne ngut ki nongialam ba la rim jong ka party ki la shah kem noh ha ki bor pulit ka sorbah.
Kine ki nongiakhih pyrshah ki la rah ryngkat ia ki dur postar jong u Rahul Gandhi kumjuh ia ki lama jong ka seng Congress ha ryngkat ka jingpyrta pyrshah Modi.
Kine ki nongiakhih pyrshah ki la leit tur shapoh Assam Secretariat (Janata Bhawan) napoh ka phylla jong ka MLA hostel, hynrei na ka liang ki bor pulit ki la khanglad noh ia ki hajan Minister Colony ha ki bynta jong ka Supermarket.Katba ki dang pynlong ia kane ka jingiaidpaidbah shapoh Secretariat na ka liang ki pulit ki la kem noh ia katto katne ki nongmihkhmat kumjuh ia ki nongkyrshan.
Hynnin ka sngi Thohdieng u nongialam ka Seng Congress u Rahul Gandhi u la shah mait kyrteng kum MP ka Lok Sabha.U Rahul uba dei u MP ka Wayanad u la shah mait kyrteng noh halor ka mukotduma bai mynrain khmat.
“U Rahul Gandhi, dkhot ka Lok Sabha uba mihkhmat ia ka Wayanad Parliamentary Constituency ka Kerela, ula shah mait kyrteng na ka jinglong dkhot ka Lok Sabha naduh ka sngi ba pynngat ha ka jingpynsajia ia u kata ha ka 23 tarik Lber, 2023 kat kum ka kyndon jong ka Article 102 (1) (e) jong ka Riti Synshar ka Ri pule lang bad ka kyndon 8 jong ka Representation of People Act, 1951” ong ka jingpyntip bala pynmih da u Utpal Kumar Singh, Secretary General ka Lok Sabha Secretariat hynnin ka sngi thohdieng.
Da kaba pynrem jur halor katei ka jingjia, u nongialam ka Seng Congress u Shashi Tharoor u la khot ia kane ka jingleh kum ka jingpynkhein ia ki kyndon kiba iadei bad ka jingsynshar paidbah ne democracy.
“Nga sngew kyndit shibun ia kane ka jingleh kaba la wan jia tang hapoh ka 24 kynta hadien ka rai jong ka iingbishar, kata watla ka jingkyrpad halor kane ka bynta kala dep ban iaid shakhmat.Kane ka dei ka kam sain hima leh donbor bad kaba long pyrshah ia ka synshar paidbah,” pynpaw u Tharoor lyngba ka twitter.
