Guwahati, Lber 06: U Myntri Rangbah ka Assam u Himanta Biswa Sarma ula ong ba hadien ka elekshon ka CID jongka Assam kan sa khot hajir ia u Nongialam ka seng Congress u Rahul Gandhi.
Haba iakren bad ki lad pathai khubor ha Bongaigaon, u Himanta Biswa Sarma ula ong, “Hadien ka elekshon u nongialam ka Congress u Rahul Gandhi yn shah khot hajir ha ka CID namar ha ka ‘Bharat Jado Nyay Yatra’ ha Assam, ki nongkyrshan ka Congress kila iakynad bad ki pulit,”.
“Lada don uno uno uba shim ia ka aiñ ha ka kti, yn khot hajir ia ki. Hadien ka elekshon u Rahul Gandhi yn hap ieng ha ka iingkashari jong ka Assam namar yn sa khot hajir ia u” ong u Sarma.
Ha ka sngi nyngkong, ki pulit Assam kila phah ia ka shithi khot hajir ia u MLA Congresd u Jakir Hussain Sikdar bad ia uwei pat u nongialam ban kylli jingkylli ha kaba iadei bad katei ka jingjia.
Ha ka ejahar la kdew ia ka kyrteng u Rahul Gandhi, ryngkat bad ki nongialam ka seng Congress kiba kynthup ia u KC Venugopal, Jitendra Singh, Jairam Ramesh, Srinivas BV, Kanhaiya Kumar, Gaurav Gogoi, Bhupen Kumar Borah bad Debabrata Saikia.
Ha ka 23 tarik u Kyllalyngkot, ki nongtrei ka seng Congress hakhmat ka jingdon lang u Rahul Gandhi bad kiwei ki nongialam kila pynpra ia ki jingker jong ki pulit, ia kaba la buh, hadien ba u Himanta Biswa Sarma ula byrngem ban ujor da ka ejahar lada ka Yatra ka thmu ban leit rung sha nongbah Guwahati.
