Guwahati, Nohprah 06 : Ki shipai Border Guard Bangladesh (BGB) kila wan rung sha Assam bad pynsangeh ia ka jingmaramot ia ka temple hajan ka wah Kushiyara kaba don ha khappud ka India-Bangladesh ha Sribhumi District ka Assam ha ka sngi Palei.
Kat kum ka jingiathuh ki trai shnong, ki shipai BGB kila wan da ki speedboat na Jakiganj Point jong ka Sylhet Division. Hadien ba poi sha ka liang ka India, kila bthah ia ki nongbylla ban sangeh ia ka jingpyrshang tei biang ia kane ka temple.
Ki shipai Border Security Force (BSF) kiba pahara ha khappud, kila poi iakren bad ki heh ka BGB, kiba la pyrshah ia ki jingpyntrei ia kane ka temple.
“Ka Manasa Mandir ka dei kawei na ki temple ba rim duh ha Assam. Kynsan kynsan, ki shipai BGB kila wan poi bad pyrshah ia ka jingmaramot. Ki shipai BSF ruh kila bthah ia ngi ban sangeh” ong ki nongshongshnong.
Kila pyntip ba ki shipai Bangladesh kila wan pynpra man ka por ia ki jaka mane blei da ki snem mynta. Ki ong ba ki shipai BGB kila wan rung sha India bad tuklar wat ia ki kam tei jingtei haba kynthoh ba lada kane ka dangiai bteng, kaei pat kaba ngi lah ban leh hala ka jong ka Ri?.
Ka Manasa temple kaba don ha Kushiyara Immersion ghat ha Sribhumi, kala jot la julor bha. Ka Sorkar Assam dang shen kala ai ia ka song pisa ba T. 3 lak ban maramot ia kane ka jaka mane blei, kaba dang shu sdang pyntrei ha kane ka taiew ba mynta.
