Guwahati, Jymmang 8: U Khun ba phetrieh jong u briew ba kynnoh leh beijot bad pyniap ia ka Khynnah 12 snem ha Margherita, ula wan ban pyndem hi dalade hakhmat ki Pulit ka Assam hynne ka sngi Nyngkong.
Kat kum ka khubor Pulit, une u Khun jong une u briew u Anan Tanti, ula phetrieh naduh ka 3 tarik Jymmang nala iing naduh ka sngi ba shah leh beijot bad shah pyniap ka Khynnah, ia kaba la lap ia ka met na septic tank.
Ki Pulit ka Tinsuki kila ioh ban kem shuwa ia u Anan Tanti bad ia ka kurim halor kane ka kam bymman kaba la jia ha Margherita.
Ia u Anan Tanti uba donkti hakhmat eh ha kane ka kam bymman, la kem da ki Pulit na Namsang tea estate kaba don ha khappud ka Assam bad Arunachal Pradesh.
Iaka kurim ka Ganga Tanti la kem da ki Pulit ka Assam halor ka jingkynnoh ba ialam bakla ia ka jingtohkit bad ka jingbuh rieh ia ki sakhi satar.
Kat kum ka khubor Pulit, kine ki shi kurim kila shah kem hadien ka jinglap ia ka metiap jong kane ka Khynnah ka septic tank ha Jayanagar, kaba hapoh ka Margherita Sub-Division ha Tinsukia District.
U Anan Tanti ula mynsaw na ka jingshah siat na baroh artylli ki kjat ha ki Pulit katba u dang pyrshang ban phet krad n aka kti jong ki Pulit. Ia une u briew la sumar mynta ha Assam Medical College bad Hospital.
Ki Pulit ki pyntip ba ia u Anan Tanti la pynngat hapoh ka kyndon 201, 302, 376 jong ka Indian Penal Code (IPC) bad ka kyndon 6 jong ka POCSO act.
Kat kum ka jingiathuh ki Pulit, kane ka khynnah kaba shahleh beijot bad shah pyniap bad kaba dang shong klas 6, kala leit bad ka Mie ban iapeit kai ia ka jingleh kmen Bihu ha ka miet jong ka 1 tarik Jymmang.
