Guwahati, Nailur 14 : Ka Kurim u Myntri Rangbah ka Assam Himanta Biswa Sarma, ka Riniki Bhuyan Sarma ha ka sngi palei kala pyntip ba kan sa ujor da ka mukotduma bai mynrain khmat ba T. 10 klur pyrshah ia u MP ka Congress Gaurav Gagoi halor ka jingkynnoh ba ka kompani jong ka, kala shim ia ka subsidy ka Sorkar pdeng ba T. 10 klur.
Kane kala mih hadien ka thma ktien kaba la iaid hapoh ka ‘X’ (Twitter ba mynshwa) hapdeng u Gaurav Gagoi bad u Hiamnta Biswa naduh ka sngi Balang bad dang iai bteng. Kane ka thma ktien ka long halor ka jingkynnoh b aka Riniki Bhyan Sarma kala donkti ha ka jyrsieh Kisan Sampada skhim ba T. 10 klur jong ka Sorkar Pdeng.
“Ka Pride East Entertainment Pvt Ltd ka dei ka kompani shimet ba mih naduh u snem 2006 kaba leh ia ka business ha ki kam bapher bapher. Ka dei ka kompani ba bud ia ka ain bad ki jingkhein jingdiah jong ka, ki don lut ha ki rynsan paidbah. Hynrei haba phai sha ka PM Kisan Sampada scheme, ka Pride Easy Entertainmeng Pvt Ltd kam shym la kam ne iohpdiang wat tang shi naia ka subsidy ka Sorkar watla ka lah biang lut nadong hadong kat kum ki kyndon bala buh” ong ka Riniki ha ka kyrwoh hapoh ka ‘X’.
U Gaurav Gagoi haba kynthoh biang bad bynrap lang ia ka jubab jong ka Lok Sabha, ula ong “Baroh shisngi hynnin ka sngi, u Himanta Biswa Sarma ula bunkam online halor ka kam jong ka kompani ka lok. Na ka bynta ka jingmyntoi jong u, nga la kren ia ka jubab jong u Myntri ka Commerce & Industries Piyush Goyal ha Parliament, uba la sei pyrthei ia ka jingshisha bad baroh arngut ki Myntri Sorkar kin hap ban pynshai”.
U CM ka Assam ula jubab kylla “Ka jubab hi (jong u Piyush) kala pynshai ia ka jingshisha ba ka Sorkar India kam pat pyllait ia kano kano ka song pisa sha kata ka kompani bala jer kyrteng. Nga kwah ban ban biang sa shisien ba ka Lok jong nga lane ka kompani ba ka iadei kam, kam pat ioh pdiang ne kam ia kano kano ka song pisa n aka Sorkar Pdeng. Lada don ba lah ban ai ia ka sakhi ia kane, nga long uba kloi ban pdiang ia kano kano ka jingpynshai kynthup ka jingshongthait noh naka kam paidbah”.
Haba kynthoh biang, u Gagoi ula ong “Sngewbha ban don ha Assam Assembly ban ai jingpynshai ha ka jaka ban type hapoh ka Twitter. Ki MLA ka Congress ha ka por mynstep kila wanrah ia ka adjournment motion ban iakren halor ki kam ka Pride Media-KMSY hynrei ka jubab jong phi kam don satia”.
