Guwahati, Iaiong 06: Ka kynhun jong ka seng Congress kaba la lam khmat da u Myntri Rangbah barim ka Chhattisgarh, u Bhupesh Baghel, ha ka sngi Nyngkong, ka la ujor ha khmat u Chief Electoral Officer (CEO) ha Guwahati, pyrshah ïa u Myntri Rangbah ka Assam bad u kyrtong ka BJP na Jalukbari Constituency, u Himanta Biswa Sarma.
Ha kane ka kynhun ki kynthup ïa ka kyrtong ka Congress na Jalukbari ka Bidisha Neog bad u President jong ka Guwahati City District Congress u Swapan Das. Ka jingujor ka la kynnoh ba ki la don ki jingpynkhein katkum ki kyndon 33, 33A, 36 bad 125A jong ka Representation of the People Act, 1951, ha kaba iadei bad ka Affidavit elekshon ba la ai da u Sarma na ka bynta ka Jalukbari Assembly Constituency No. 37.
Katkum ka jingong jong ki nongmudui, la kynnoh ba katei ka affidavit ka don ka jingbuhrieh ia ki mar ki mata kiba don shabar ri, kynthup ia ki mar ki mata kiba iadei bad ka Dubai, bad ka pyni ia ka jingkiew kaba 665 percent ha ki mar ki mata ba la pynbna. Ki nongialam ka Congress ki la kynnoh ba ki jingpynpaw ba la pynpaw ha ki kot thep kyrteng ki buh jingkylli kiba jur bha shaphang ka jinglong kaba shai bad kaba thikna.
Haba kren sha ki lad pathai khubor hadien ba la dep ban aiti ia ka jingujor, u Bhupesh Baghel u la kynnoh ba ki katto katne ki jingdon jingem shabar ri, kynthup ia kawei ka flat bad kawei ka hotel suite, kim shym la kdew ha ka affidavit. U la pynpaw ba ka seng ka la aiti ïa ki kot ki sla sha ka Election Commission ban eksamin bad pynshisha shuh shuh.
Shuh shuh u Baghel u la ong ba ka seng kan dang bteng ban buddien ia kane ka kam lyngba ki lad ain bad riti synshar bad ka lah ban leit sha ki central investigative agencies lada donkam. U la bynrap ruh ba ka Election Commission kan eksamin ïa kane ka jingujor bad kan sa leh ïa kaba dei katkum ka aiñ.
Kane ka jingjia ka la mih shisngi hadien ba ka jingïakynad ha ka saiñ hima sima ka la nang jur hapdeng ka BJP bad ka Congress hadien ki jingkynnoh bad ki jingkynnoh pyrshah kiba ïadei bad ki nongïalam ba rangbah ha ka kyrdan jong ka ri ne national level.
La khmih lynti ba ka Election Commission kan bishar bniah ïa kane ka jingujor bad ban pynshisha ïa ki jingdawa katkum ki kyndon jong ka Representation of the People Act.
 ha Guwahati, pyrshah ïa u Myntri Rangbah ka Assam bad u kyrtong ka BJP na Jalukbari Constituency, u Himanta Biswa Sarma.){kind=link}