Guwahati, K’lyngkot 24: U Myntri Rangbah ka Assam Himanta Biswa Sarma ha ka sngi Ba-ar, ula ong ba ki Pulit kila register ia ka ejahar pyrshah ia u Nongialam ka Congress Rahul Gandhi, KC Venugopal, Kanhaiya Kumar bad kiwei halor ka jingkynshoit ban pynmih jingkulmar, pynjulor ia ki nongkynti u paidbah bad ka jingktah kti ia ki Pulit.
Kane kala mih hadien ba ki nongkitkam ka Congress kila iapyni bor bad ki Pulit namar ka jingkyntait ban ai jingbit ia ka Bharat Jodo Nyay Yatra u Rahul Gandhi ba kan rung sha Guwahati.
Ia ka case la file tang da ki kynta hadien ba u Myntri Rangbah ula bthah ia u Director General of Police (DGP) ban register case pyrshah ia u Gandhi uba la pynshit ia ki paidbah ban pynpra ia ki jingker ki pulit bad khot ruh ia kane ka kam jong ki kum ka buit ki Naxalite.
“Nga la bthah ia u @DGPAssamPolice ban register case pyrshah ia u Nongialam jong phi@Rahul Gandhi halor ka jingpynshit ia u paidbah” ong u Myntri Rangbah ha ka tweet kaba long ruh ka jubab ia ka jingthoh jong u President ka Youth Congress Srinivas BV.
“Halor ki kam pyntriem, jingaiding, pynjulor ia ki nongkynti paidbah bad ktah kti ia ki Pulit da ki dkhot ka Congress, la register ia ka ejahar pyrshah ia u Rahul Gandhi, KC Venugopal , Kanhaiya Kumar bad kiwei kiwei hapoh ka kyndon
120(B)143/147/188/283/353/332/333/427 IPC R/W Sec. 3 of PDPP Act.” Ong u Himanta Biswa Sarma ha ka X.
